Әлемдік автонарықтың үштен бірін Қытай өндірушілері жаулады

Дүниежүзілік автонарықтың наурыздағы көлемі 8.15 млн автомобиль болды, жергілікті автоөндірушілер қауымдастығының есебі бойынша оның 33 %-ы Қытай өндірушілерінің үлесінде.

Биыл алғашқы үш айда Қытай автоөндірушілері шетелге 470 мың техника жөнелтіп, жыл сайынғы өсімі 40 пайызға жетті. Қытайда өз кәсіпорындарын ашқан және көлікті экспортқа жіберетін шетелдік брендтерді есепке алғанда, жеткізу көлемі 1.32 миллионды құрады, бұл бір жыл бұрынғы көрсеткіштен 23 % артық.

Қытайдағы ірі экспорттаушылар қатарына SAIC, Chery, Great Wall және BYD кіреді, ал соңғысы электрлі көлік (гибридті және электромобильді) жеткізуде көш бастады. Олар үшін негізгі сыртқы нарық Еуропа болды, бірақ қытайлық автоөндірушілер екі Америкаға 100 мыңға жуық машина сатқан.

Toyota әлемдік рейтингте үздік атанды. Ол үлесі 10 %-дан (10.6%) асқан жалғыз концерн. Екінші сатыда Volkswagen (9.5%), үшінші орында Hyundai (7.4%) тұр. Соңғы орында болса да, үздік ондыққа кірген Қытайдың жалғыз бренді Geely болды. 2024 жылдың алғашқы үш айында концерн 738 400 көлік саудалады.

2024 жылдың бірінші тоқсанында әлемде 21.05 млн машина сатылды, бұл былтырғы осы кезеңмен салыстырғанда 3 % көп. Қытайдағы сарапшылар нарық пандемиядан және микроэлектроника дағдарысынан кейін бірқалыпты қарқынмен қалпына келуін жалғастырады деп болжады. 2024 жылдың аяғына қарай оның көлемі 90 млн автомобильден асуы мүмкін.