Канада автопаркті жаппай электрлеу жоспарын өзгертті

Канада іштен жанатын қозғалтқышы бар жаңа машина сатуға тыйым салу туралы жоспарын қайта қараған елдердің қатарына қосылды. 2035 жылға қарай автосалондарда тек электрлі көліктер қалуы керек еді. Бірақ премьер-министр Марк Карни ұсынған жаңа стратегияға сәйкес елде 2035 жылы жаңа автомобиль нарығындағы батареялы модельдердің үлесі 75 %-ға жетіп, 2040 жылы 90 %-ға жуықтауы керек.

Билік экологиялық стандартты қатаңдату арқылы автоөндірушілерді зиян шығарынды деңгейі төмен өнім шығаруға ынталандырмақ. Клиенттер электромобиль, отын элементімен жүретін автомобиль және гибрид таңдаса, 2.5-5 мың доллар субсидия алады.

Канада экологиялық таза көлікке көшу процесін жеңілдету үшін қуаттау бекеттерін көбейтуге 1.5 млрд доллар инвестиция құяды.