Әкімдік Әл-Фараби даңғылының Желтоқсаннан Қожанов көшесіне дейінгі бөлігіне жергілікті бақтарда өсірілген талшын, қарағай, шырша сынды ағаштарды отырғызбақ. Сонымен қатар, қаланың 2.5 мың шаршы метрді құрайтын аумағына гүлдер мен бұталар егу жоспарланып отыр. Қалалық әкімдіктің баспасөз қызметі хабарлағандай, ескі қоршауларды алу жұмыстары 30 наурызға дейін жүргізіледі, ал көшет егетін орындарды дайындауға тағы бес күн қажет, яғни шара 5 сәуірге дейін жалғасады.
Жол қозғалысының және жаяу жүргіншілердің қауіпсіздігін қамтамасыз ету үшін аталған жұмыстар жүргізілетін уақыт аралығында полиция департаментіне жол-патрульдік жасақтар санын көбейтуге тапсырма берілді. Қоршау алынып жатқан қазіргі уақыттың өзінде даңғыл бойындағы көлік қозғалысы біршама қиындаған.
Осы орайда Әл-Фарабидің ортасын бөліп тұрған қоршаулардың 2000 жылдардың басында орнатылғанын айта кеткен жөн. Бұл қоршаулар тек сән беріп қана қоймай, жол ережесін бұзуды ерсі санамайтын жаяу жүргіншілерге де кедергі келтіретін. Сондай-ақ, соққы тисе күлдей шашылатын дәл осы жеңіл темірлер жылдамдықты асырамын деп қоршауға бірақ соғылған талай жүргізушінің ауыр жарақат алуына себеп болған еді. Ал енді, даңғылдағы жылдамдықты сағатына 60 шақырымға дейін төмендеткен қала билігі Әл-Фарабиді сәндеу жұмыстарын бастап кетті.
Комментариев: 0