Жол-көлік оқиғасы кеше, кешкі бестер шамасында Асқаров және Мұстафин көшелерінің аралығындағы тоннельде болды. Куәгерлердің айтуынша, «Газель» мен Mercedes-Benz Әл-Фараби бойымен батыс бағытта қозғалып бара жатқан. Бір кезде седан бір қатардан екіншісіне шұғыл ауыса бастайды да, жүргізуші рөлге ие бола алмай, шағын жүк көлігіне соғылады.
Соққының қатты болғаны соншалық, артқы белдігі жұлынып кеткен «Газель» бір жағына жантайып қалған. Шағын жүк көлігінің жүргізушісі жеңіл жарақат алды, ал «мерседесті» тізгіндеген азамат пен ондағы жолаушы ауруханаға жеткізілді.
Жол-көлік оқиғасының мән-жайын полицейлер анықтауда.
Естеріңізге сала кетейік, біраз уақыт бұрын сол кезде қаланы басқарған Б.Байбектің бастамасымен магистральді көшелердегі жылдамдық сағатына 60 шақырымға дейін шектелген болатын, бірақ қала тұрғындары қарсылық танытқандықтан, әкімдік бұл шешімнен бас тартуға мәжбүр болды. Тамыз айының аяғында бұрынғы жылдамдық режимі қалпына келтіріліп, жүргізушілердің сағатына 80 шақырым жылдамдықпен қозғалуына рұқсат берілді.
Комментариев: 0