Huawei мен Seres альянсы құрған Aito бренді жаңа M7-нің алғашқы суреттерін жариялады. Жаңа өнімнің дебюті қыркүйекке жоспарланған, сол күн жақындағанда техникалық сипаттамасы белгілі болады.
Суреттерден Aito M7-нің сырт келбеті қалай өзгергенін көре аласыз. Радиатор торының орнында бүтін панель тұр, алдыңғы бамперінде шағын ауа өткізгіш бар және M8 моделіне ұқсайтын жаңа жарық техникасымен жабдықталған. Шанақ түстеріне жаңа қызыл реңк қосылған, шатырына Huawei-дің жаңа ADS4 жүйесіне кіретін лидар орнатылған.
Өлшемдері — 5020×1945×1760 мм және бұл өзгеріссіз қалуы мүмкін. Кроссовер M8-ден шамамен 150 мм қысқа, әрі сол модельдің күштік құрылымын алады деген болжам бар. Ол 160 ат күшін беретін 1.5 литрлік турбомотор мен жалпы қуаты 309-533 ат күшіне жететін бір немесе екі электрлі қозғалтқыштан тұрады. Батареялардың сыйымдылығы — 37–53.4 кВт⋅сағ.
Қазір Aito M7-нің Қытайдағы бағасы — 249 800–329 800 юань (18.8–24.8 млн теңге). Модельдің саудасын ескерсек компания бағаны өсірмейтін сияқты. Былтыр Aito кроссовердің 193 мыңнан астамын сатса, 2025 жылдың бірінші жартысында сұраныс 70 % құлдыраған. Уақыт өте келе жаңа көлік шетелге Seres брендімен шығуы ықтимал.
Aito гибридтері Қазақстанда да ресми сатылады. Моножетекті M7-нің бастапқы бағасы — 20 млн теңге, үздік толық жетекті модификацияның құны 25 млн теңгеден асады.
Комментариев: 0