Көне көліктер сататын америкалық дилер 1962 жылғы Aston Martin DB4 купесін саудаға салды. DB4 сирек кездеседі, модельдің 1100 данасы ғана шыққан. Біз сөз етіп отырған машина кейінгі 30 жыл бойы қарапайым сарайда қараусыз қалыпты.
Дилер британиялық купе Вьетнам соғысының ардагеріне тиесілі болғанын айтады. 1970 жылдары ол жергілікті көлік жөндеу орнында жұмыс істеген, сол кезде шеберхана иесі одан осы Aston Martin DB4-ті жөндеуге көмектесуді сұрайды.
Жұмыс аяқталған соң автосервис иесі машинаны қызметкеріне сыйлапты, ал ол купені толық жөндеу үшін үйіне сүйреп әкетеді. Бірақ ардагер классикалық көлікті сол беті жүргізе алмаған секілді. Машина қазір оны сатуға қойған адамның қолына қалай түскені белгісіз. Ол бұрынғы иесінің мұрагері болуы мүмкін.
Aston Martin DB4 тозығы жеткен күйде сатылады: бояуы өшіп, бамперін тот басқан, салонның сәні тайып, сұры қашқан. Соған қарамастан ол 320 мың долларға бағаланып отыр. Машинаның түпнұсқа агрегаты орнында тұр. Кей мәлімет бойынша купені жақсылап қалпына келтірсе, бағасы миллион доллардан асуы мүмкін.
Комментариев: 0