Швеция жүріп келе жатқан электромобильді қуаттай алатын алғашқы трассаны ашуға дайындалып жатыр. 2025 жылы Стокгольм, Гётеборг және Мальмё арасындағы E20 тас жолы іске қосылады. Билік 3000 км жолға ERS жүйесін енгізуді жоспарлап отыр.
ERS мобильді құрылғы қолданушыларға бұрыннан таныс Qi сымсыз қуаттау жүйесіне ұқсас жұмыс істейді. Мамандар жол төсеміне электр тарататын катушка орнатып, автомобильді қабылдағышпен жабдықтайды. Бұл тәсіл қаншалықты тиімді болатыны жайлы нақты ақпарат жоқ, бірақ схема электромобильдің жүріс қорын арттырып, көлік бағасын түсіруге (сыйымдылығы аз батарея орнату арқылы) мүмкіндік береді.
Швеция электрлі жол салуға бірінші рет талпынып отырған жоқ. Түрлі жүйеге негізделген жол бөліктерін 2016 жылдан бері сынақтан өткізіп жүр. Мамандар Евледегі 2 шақырым жол бөлігінде жүк көлігін троллейбус сияқты жүргізіп көрген.
Кейін жүк көлігіне арналған токөткізгіш жолағы бар тағы бір жол бөлігі пайда болды. Мұндай мысал өте көп. Бұл схеманы Швециядан басқа елдер де сынақтан өткізіп жатыр. Мысалы, швед тәжірибесіне сүйеніп жұмыс істеп жатқан Франция мен Германияны айтуға болады.
Комментариев: 0