2026 жылдан бастап жүргізушілер дайын немесе VIP нөмірді ғана емес, өздері қалаған әріп пен санды таңдай алады. Ол сұраныс жоғары нөмірлер тізіміне кірмесе, құны 10 АЕК немесе 43 250 теңге болады.
Алғашқы күндері халық бұл қызметке тек арнайы ХҚКО арқылы тапсырыс берді. 5 қаңтарда қызметкерлер 11 мыңдай өтінім қабылдаған, бірақ бұл тек бастамасы еді. Онлайн сервис іске қосылғаннан кейін нөмір алушылардың саны одан сайын артты. 8 қаңтарда сервис eGov.kz порталы мен eGov Mobile мобильді қосымшасында пилоттық режимде жұмыс істеді.
15 қаңтарда бірінші аптаның нәтижесі шықты. Электрондық үкімет баспасөз қызметінің мәліметінше небәрі екі күнде 113 мың өтінім түскен, қазір 226 мыңнан асып кетті.
Дегенмен барлық процесс мінсіз өтіп жатқан жоқ. Кей қолданушы төлем жасағаннан кейін таңдаған нөмірі әлі тұрғанын байқапты. Көбіне мұндай жағдай рәсімдеу процесінің соңғы кезеңі аяқталмағандықтан туындайды. Мамандар қайта өтінім жіберуге, бірақ үшінші қадамда «Бұрын төленген» опциясын таңдап, банкті және төлем жасалған күнді жазуға кеңес берді. Рәсім толық аяқталған соң нөмір пайдаланушының атына тіркеледі, басқалар оны таңдай алмайды.
Комментариев: 0