Көлік нөміріне тапсырыс бергендердің саны рекордтық деңгейге жетті

5 қаңтардан бастап көлік иелері кез келген нөмірге тапсырыс бере алады. Қызмет іске қосылған күні-ақ айтарлықтай сұранысқа ие болды. Арнайы ХҚКО-да кезекте тұрғандардың суреті мен видеосы әлеуметтік желіде тарады.

6 қаңтарда үкімет отырысында Жасанды интеллект және цифрландыру вице-министрі Ростислав Коняшкин бір күнде шамамен 11 мың өтінім түскенін, соның ішінде сұраныс жоғары нөмірлер бар екенін айтты.

Дайын нөмір алу үшін 2.8 АЕК (2026 жылы 12 110 теңге) төлеу керек. Қалаған комбинацияны тапсырыс бойынша жасау 10 АЕК (43 250 теңге) тұрады, бірақ ол VIP-тізімге кірмеуге тиіс. Соңғысы үшін тариф 15-285 АЕК (64 875-1 232 625 теңге) аралығында.

Коняшкин шенділер осы аптада қалаған нөмірге онлайн тапсырыс беру функциясын іске қосуды жоспарлап отырғанын атап өтті.