XX ғасырдың соңғы он жылында General Motors тым кішкентай көліктерден арылып, ірі седан шығара бастады. Аталған кезеңде Chevrolet Caprice (бізде «котлет» деген атаумен танымал), Buick Roadmaster, жаңа Mercury Grand Marquis пен сол сияқты V8 орнатылған ауыр машиналар жарық көрді.
1990 жылы концерннің отбасылық көлік сегменті Pontiac Trans Sport моделімен толықты. Алдыңғы бөлігі тым ұзын темір тұлпардың интерьері оның берік әрі төзімді «америкалық» екенін еске салатын. Машина соққыға төзімді фибергласпен қапталғандықтан, тіпті қазір де оның тот басқан жерін табу мүмкін емес.
Айтпақшы, «Транс Спорттың» өлмейтін машина екенін 2019 жылы көрермен назарына ұсынылған «Zомбилэнд: Контрольный выстрел» фильмінен көруге болады. Комедиялық боевикте Вуди Харрельсон сомдаған кейіпкер одан бірнеше рет құтылмақ болады, алайда ойы іске аспайды, мәселе тек граната қолданғанда шешіледі.
Машина бірқалыпты қозғалу үшін пневматикалық аспа опция ретінде ұсынылды, ал 1994 жылы модельге электр жетекті сырғымалы есік орнатылды.
Америка тұрғындары новацияны құптағанымен, дәстүрлі көлікті құп көреді. Содан болар, футуристік минивэн өз отанында бағаланбай, «қол шаңсорғышы» аталып кетті, кейін мамандар оның тұмсығын кесіп, әуре болған-ды. Есесіне қарт құрлықта модель көлікке құмар жандардың көңілінен шықты. Бірақ Еуропадағы машинаға қойылған мотор әлсіздеу болды және механикамен жұптасатын. Сондықтан Kolesa.kz-тегі хабарландырулар арасынан 2.3 төрттік мотор және МБҚ дегенді көрсеңіз, ол Еуропадан келгені анық, ал егер капот астында автоматпен жұмыс істейтін алтылық тұрса, көлікке янки иелік еткен болуы керек.
Қазір модель ғана емес, марка да тарих қойнауын кеткендіктен, 1996 жылға дейін шығарылған бірінші буындағы Pontiac Trans Sport көпшіліктің жас кезін еске салатын естелікке толы дүниеге айналды. Машина әлі де белсенді қолданылады, әрі бағасы да қалтаға салмақ түсірмейді. Бірақ сұраныс жоғары деп айта алмаймыз, себебі түрі оғаштау көлік тым ескі әрі оған бөлшек табу оңай емес.
Комментариев: 0