Негізі, каршеринг біздің ел үшін таңсық ұғым емес. Бірнеше жыл бұрын Қазақстанда Doscar қызметі іске қосылған болатын. Бірақ оны қалай қолдану қажеттігін және қандай қиындықтарға ұшыратуы мүмкін екендігін әркім түсіне бермейді. Ендеше, Anytime атауымен елге аяқ басқан компанияны мысал ете отырып, осы мәселені талқылап көрейік.
Ең алдымен нені білген жөн?
Каршеринг такси ретінде де, жеке көлікке иелік ету ретінде де әлдеқайда арзан, әрі қоғамдық көлікпен салыстырғанда анағұрлым ыңғайлы, бірақ тек бір шартпен — кептеліссіз жерлермен жүру қажет. Олай болмаған жағдайда қалтаңыз үшін тиімділігі төмендейді.
Anytime қызметінің бірнеше жағымды бонустары бар. Көлікті жуудың қажеті жоқ, әрі жанармай үшін де клиент емес, компания төлейді. Сонымен қатар, көлікті жол жиегіне қойғаныңыз үшін ақша төлеудің керегі болмайды. Ол ақысыз.
Қызметтің пайдаланушысы атану үшін клиенттің жасы 21-ден кем болмауы тиіс, әрі оның кемі екі жылдық жүргізушілік өтілі мен қаражаты бар банк картасы болуы қажет.
Ережелер, талаптар мен айыппұлдар… Айыппұл көп
Компаниямен жасалатын келісімшартты мұқият оқыған жөн. Әсіресе, ЖКО-ның орын алуымен байланысты 2.35.9 тармағынан 2.35.16 тармаққа дейінгі тұсына және № 3 қосымшаға назар аудару қажет. Соңғысында жол ережесін бұзған жағдайда пайдаланушылар төлеуге келісім беретін айыппұлдардың барлығы жазылған. Олардың сомасы бір миллион теңгеге дейін барады. Міне олардың біразы:
| Жол ережесін бұзу | Айыппұл көлемі, тг |
| Көлік құралындағы трекерді өз еркімен өшіру не оған зиян келтіру | 800 000 |
| Клиенттің рөлде алкогольдік, есірткілік, уыттық не өзге де масаю күйінде отыруы | 350 000 |
| Көлік құралын басқаруды алкогольдік, есірткілік, уыттық не өзге де масаю күйіндегі тұлғаның басқаруына беру (жол беру) | 1 000 000 |
| Көлік құралын газонда не көгалдандырылған аумақтарға қалдырып кету (КҚ-ын пайдалану режиміне қарамастан), абаттандыру ережелерін бұзумен тең. | 500 000 |
| КҚ-ын клиенттің әрекеті (әрекетсіздігі) нәтижесінде эвакуциялау жағдайында | 50 000 |
| КҚ-ын оған зақым келуі мүмкін ұрлап кету, КҚ-ын тонау, КҚ-ның ішіндегі заттарды ұрлау, КҚ-на қатысты басқа да заңсыз әрекеттер жасалуы мүмкін жағдайда қалдырып кету | 50 000 |
| Темекі шегу, электронды шылымды (сондай-ақ табаксыз), бу генераторын (вейп және соған ұқсастарын), қорқор (сондай-ақ табаксыз), азоттың шала тотығын (медициналық көрсеткіштер болған жағдайда қолданудан бөлек) қолдану | 10 000 |
| Клиенттің КҚ-ына АИ-95 маркасынан төменгі жанармай құюы, егер ол КҚ-ның істен шығуына әкеп соқпаса | 10 000 |
| Әкімшілік айыппұлды 2 күндік мерзімде төлемегені үшін салынатын бір жолғы айыппұл | әкімшілік айыппұлдың жалпы көлемінің |
Қосымшадағы картада көк және күлгін түсті екі шекара бар. Алғашқысы автокөлікті қолдануға болатын аумақты көрсетсе, екіншісі көлікті қалдырып кетуге рұқсат етілген жерлерді көрсетеді. Бұл тұста мынаны білген маңызды: егер автокөлік күлгін түсті аумақта тұрса да, бұл оны кез келген жерге қалдырып кете беруге болады дегенді білдірмейді. Қалдыратын орын барлығына қолжетімді болуы тиіс. Ешқандай шлагбаум, қақпа мен жабық паркинг деген болмайды. Тұраққа қою барысында ЖҚЕ-ін бұзуға болмайды, әрине.
Қарапайым мысал: пайдаланушы көлікті алып жүргізді де, оны әдетінше ауладағы газонға қойып кетті. Дәл сол күні күтпеген жерден тәртіп сақшылары келіп қалды. Бұл жағдайда клиентке тек әкімшілік айыппұлды төлеп қоймай, седанды өздігінен айып тұрағынан шығарып, оған қоса 550 000 теңге көлеміндегі ақшаны Anytime компаниясына айыппұл ретінде беруге тура келеді. Тиімсіздеу, солай емес пе?
Компания пайдаланушыға көлікті барлық ережеге сай қойғанның өзінде айыппұл салуы мүмкін. Егер автокөліктің дөңгелектерін не әйнектерін шешіп алып кетсе, онда Anytime көлік қалдырылған жер жеткілікті дәрежеде қауіпсіз болмаған деген шешім шығаруы мүмкін. Бұл жағдайда сіз 50 000 теңгеден қағыласыз. Сондай-ақ, кеңсе келген шығынды пайдаланушыдан өндіру құқығын өз еншісінде қалдырады.
ЖКО нәтижесіндегі зақым. ЖКО-на жол қозғалысының өзге қатысушысы кінәлі болған жағдайда еш мәселе туындамауы тиіс. Барлығын да сақтандыру компаниясы өтейді. Ең бастысы, ЖКО жайлы тек полицияға ғана емес, Anytime операторларына да бірден хабарлау керек. Соңғылары әрі қарай не істеу керектігін түсіндіреді. Көпшілік әдетке айналдырған оқиға орнында келісімге келу деген болмайды мұнда.
Ал жол апаты каршеринг қолданушысының кесірінен болғанда, жауапкершілікті толықтай мойынға алуға тура келеді, дегенмен, тарифте қарастырылған (100 не 200 мың теңге) жүргізушінің ең жоғарғы жауапкершілігінің аясында. Алайда мұның бәрі келісімшарттың барлық шарттары орындалып, ал жүргізуші мас емес болған жағдайда ғана жүзеге асады. Әйтпесе клиент одан әлдеқайда көбірек шығындалады. Тек компанияның айыппұлдарының өзі — 350 мың теңгеден асып жығылады.
Жолға аттанбас бұрын міндетті түрде не істеу керек
Көлікті брондау әрекетін тәптіштеп айтудың қажеті жоқ — ол түсінікті деңгейде. Көлікті жалға алмас бұрын оның сырт келбетіне назар аударған дұрыс. Өз қауіпсіздігіңіз үшін тіпті тым ұсақ болса да, сызат түскен жерлерін камераға түсіріп алған жөн. Егер бірдеңе назардан тыс қалса, оны сіздің мойныңызға іліп қоюы да ғажап емес. Яғни, сол үшін сіздің төлеуіңізге тура келеді.
Егер көлік зақымданған болса не істеу керек? Егер сіз автокөліктің сызаттар мен майысқан не кетік жерлері барын байқасаңыз, онда оларды суретке түсіріп, қосымшада көрсетілген телефон бойынша сall-орталықпен байланысу қажет.
Бұл көліктермен жүру құны қанша?
Темір тұлпарды жалға алудың ең оңтайлы мезгілі — таңғы 6-дан 10-ға дейінгі аралық. Бұл кезде әр минут үшін 19 теңге төлейсіз. Яғни, егер үйден жұмысқа дейінгі аралық 30 минутты қамтыса, онда 570 теңге беру қажет.
Сағат таңғы 10-нан асқанда жүру құны біршама артады. Тарифке байланысты ол 44 не 55 теңгені құрауы мүмкін.
Сонымен қатар, тәуліктік екі тариф бар: базалық және «Сказка». Алғашқысы 23 сағат 59 минут үшін 10 мың қаражатты қажет етсе, екіншісі — 13 мың теңгені құрайды. Айырмашылығы, сол бұрынғы — ЖКО кезіндегі жауапкершілік. Мұндай тарифтердің артықшылығы жүру жолының шектелуінде. Шарттармен тәулігіне 110 км қарастырылған. Одан көп жүрсеңіз — әр шақырым үшін (30-40 теңге) төлейсіз.
Маңызды: тұрақ орнында моторды өшірмес бұрын тұрақ тежегішінің көтеріліп тұрғанына, ал АББҚ иінтірегінің Р қалпында тұрғанына көз жеткізіп алыңыз. Әйтпесе мобильді қосымша жалға алуды аяқтауға мүмкіндік бермейді де, төлейтін сома ұлғаюын жалғастыра береді.
Сонымен, каршеринг қызметін қолданудың қажеті бар ма, жоқ па?
Біз жоғарыда жазғандай, каршеринг аса тиімді бола алады. Ең бастысы — компанияның барлық шарттары мен ережелерін сақтаған жөн. Әйтпесе, тек айыппұлдардың сомасының өзі көлік бағасынан асып түсуі ғажап емес.
Бірқатар техникалық қиындықтар жайын да естен шығармаңыз. Қазақстанда Anytime енді ғана іске қосылды, бірақ Ресейде бірнеше жыл қатарынан жұмыс жасап келеді және жүйе жұмысына қатысты шағым да көп. Пайдаланушылар көбіне жалға алуды аяқтай алмайтындарын не көлікті жаба алмайтындарын жазады. Бұл мәселелер біздің елге де жете ме, бұл жағы әзірше белгісіз.
Комментариев: 0