Біздің бір танысымыз көше қиылысында басқа көшеге бұрылыс жасайды. Ол осы маңмен көп жыл бойы жүретін. Бірақ бұл жолы патрульдік көліктің бамперіне тірелгенге дейін екі жүз метрдей жүріп өткен. Көшенің бір бағытты қозғалысқа көшкеніне бір апта болған, ал біздің кейіпкер қарсы бетке шығып кеткен. Шынында, тиісті белгілер ілініп тұр, бұл бағытта қозғалуға тыйым салатын «кірпіш» белгісін де ол байқамаған… Жолдың қарама-қарсы бетіне шығу, жүргізуші куәлігінен айырылу, «Оңай» картасы — инспектор шамамен оны осындай болашақтың күтіп тұрғанын айтады. Даусыз, бұл жол ережесін өрескел бұзу, бірақ ӘҚБК-де бұл жүргізуші куәлігінен айырумен емес, бар болғаны 3 АЕК көлеміндегі айыппұлмен «бағаланады». Міне сізге отбасылық бюджетті сақтауға арналған жадынама.
Алаңғасарлық үшін төлеуге тура келеді. Бұл сынған көлік пен зардап шеккен адамдар емес, тек айыппұл болса жақсы ғой. Қанша төлеу керектігі сіздің жанарыңыздан өз біліміңізге деген сенімділіктің қаншалықты айқын көрінетіндігіне байланысты.
Мұндай ереже бұзушылық үшін білмейтіндерге ӘҚБК-нің 596 бабының 3 бөлігіне сай айып тағу оңай болады: «Егер бұл жол жүрiсi қағидаларында тыйым салынған жағдайларда, жолдың жүру бөлiгiнiң қарсы бағытта жүруге арналған жағына , оның ішінде кері бұрылып немесе бұрылыс жасап шығу — бір жыл мерзімге көлік құралдарын басқару құқығынан айыруға әкеп соғады».
Тек бір бағыттық қозғалыстағы көшелерде қарама-қарсы бағытта қозғалатын көліктерге арналған жол бөлігі жоқ!
Бұл жағдайда жол ережесін бұзудың Кодекстің 601 бабына қатысты екенін есте сақтаған жөн: «Жол белгiлерiмен немесе жолдың жүру бөлiгiндегi таңбалармен көрсетiлген талаптарды сақтамау». ӘҚБК-не сәйкес, бұл үшін 3 АЕК немесе 2017 жылы 6807 теңге айыппұл салынады. Тіпті дәл осы ережені қайта бұзғанның өзінде, бұл қателік жүргізуші куәлігінен айырумен емес, тек 10 АЕК не 22 629 теңге көлеміндегі айыппұлмен шектеледі.
Мұны МАИ қызметкерлерінің пайдалануы мүмкін бе? Мүмкін. Өзіңіз ойлаңызшы, жазалаудағы қандай зор айырмашылық, және оны қалай пайдалануға болатыны да түсінікті.
Алматыдағы қозғалысты қайта ұйымдастыру тұрғысынан маңызды екі көше — Шевченко мен Құрманғазы — 2017 жылдың қыркүйек айынан бастап бір бағытты болады. Алдыңғы тәжірибеге сәйкес, жолдың жаңа ережелер қолданысқа енгізілген бөліктерінде қарсы бетке шығып кетіп, ереже бұзатындар санының өсімі күтіледі.
Кейбір жерлерге 5.7.1, 5.7.2 «Бір бағытты қозғалыстағы көшеге шығу» белгілерін іліп үлгермейді, кейде жүргізушілер оларды байқамай, әдеттегі әрекеттерін жасайды, ал кейбір жерлерде 5.5 «Бір бағытты қозғалыстағы жол» ( 3.1 «Кіруге тыйым салынады», 3.18.1 «Оңға бұрылуға тыйым салынады» және т.б.) белгілері еленбейді. Мұның барлығы бағытқа қарсы қозғалуға әкеп соғады. Мұқият болыңыздар.
Сіздерге осы материал бойынша шпаргалканы сақтап қойып, достарыңызбен, жақындарыңызбен бөлісуге кеңес береміз, себебі, қалаларда бір бағытты көшелердің саны артып келеді. Ал көптеген жүргізушілер үшін —бұл кенеттен болатын өзгеріс!
Ережелерді білу тек әмиян үшін ғана емес, денсаулық үшін де пайдалы!
Сапарыңызға сәттілік тілейміз!