Міне, желтоқсан да келіп қалды, ал бұл көлік салығын төлеу үшін соңғы ай қалды дегенді білдіреді. Егер уақытында үлгермесеңіз, онда іске тиісті органдар кіріседі: өсімақы біртіндеп жинала береді де, уақыт өте келе бұған сот орындаушылары қосылады, олар өз кезегінде автокөліктің қозғалысына шектеу қойып не оның иесін шекара асу мүмкіндігінен де айыруға құқылы.
Қанша төлеу қажет?
Салық сомасын есептеу техникаға іс жүзінде иелік ету мерзіміне негізделеді. Егер автокөлік өткен маусым айында сатып алынған болса, онда бір жыл үшін емес, тек жеті ай үшін ақы төлейсіз.
Мемлекет алдындағы қарызыңыздың көлемін білу үшін біздің сайттағы не ҚР Қаржы министрлігі Мемлекеттік кірістер комитетінің не egov.kz порталдарындағы салық есептеуіштің көмегіне жүгінуіңізге болады. Соңғысы бірден төлем жасауға мүмкіндік береді, бірақ ол үшін порталға тіркелу керек.
Жуырда көлік салығының мөлшерін WhatsApp арқылы да білуге мүмкіндік беретін қызмет жүйесі жұмысын бастады. Дегенмен, ол барлық өңірлер үшін қолжетімді емес. Тиісті мәліметті дүйсенбі мен жұма аралығында 9:00-ден 18:30-ға дейін алуға болады.
WhatsАpp нөмірлері:
- Астана: 8-702-601-37-97
- Алматы: 8-707-847-52-01
- Алматы облысы: 8-701-976-67-76
- Шымкент: 8-778-691-76-15
- Түркістан облысы: 8-771-898-92-55
- Қызылорда облысы: 8-776-444-44-22
- Батыс Қазақстан облысы: 8-700-086-60-01
- Ақмола облысы: 8-701-596-72-44
- Шығыс Қазақстан облысы: 8-701-602-73-44
- Солтүстік Қазақстан облысы: 8-707-363-64-08
- Қарағанды облысы: 8-771-194-01-04
- Жамбыл облысы: 8-708-455-71-61
- Павлодар облысы: 8-707-612-97-76
- Қостанай облысы: 8-747-467-02-09
- Атырау облысы: 8-775-918-26-58
- Ақтөбе облысы: 8-775-593-10-01
- Ақтөбе: 8-747-755-02-20
- Ақмола облысының Целиноград ауданы: 8-702-381-90-46
Маңызды: егер автокөлік сатылып кеткен болса, оның алдыңғы иесі төлеген салық көліктің жаңа иесіне көшпейді.
Естен шығармаған жөн: Қазақстанда 2013 жылдың 31 желтоқсанынан кейін өндірілген (дайындалған не жиналған) не ҚР аумағына 2013 жылдың 31 желтоқсанынан кейін кіргізілген қозғалтқыш көлемі 3 000 текше см-ден жоғары көліктердің қожайындары көбірек шығындалады.
Қайда төлеу қажет?
Салық сомасын терминал арқылы, egov.kz порталында, кез келген банкте және интернет-банкинг көмегімен, «Қазпошта» АҚ-ның бөлімшелері мен мемлекеттік кірістер басқармасының аймақтық кассаларында төлеуге болады. Ол үшін көлік құралының VIN-коды мен ЖСН-ін (егер темір тұлпар сіздің атыңызға тіркелмеген болса, автокөлік иесінің ЖСН-ін) білу жеткілікті.
Маңызды: егер сіз сақтандыру арқылы өзгенің көлігін тізгіндеп жүрсеңіз, онда салық төлеу барысында көлік иесінің ЖСН-ін ғана емес, көлік пен оның қожайыны тіркелген ауданды да білуге тиіссіз.
Кім салықтан босатылады?
Салық төлеуден электромобиль иелері босатылған. Гибридтерге бұл жеңілдіктің еш қатысы жоқ. Сонымен қатар, заңға сай:
- Ұлы Отан соғысының қатысушылары және оларға теңестірілген адамдар, Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСРО-ның ордендерімен және медальдарымен марапатталған адамдар, сондай-ақ 1941 жылғы 22 маусым — 1945 жылғы 9 мамыр аралығында кемінде алты ай жұмыс істеген (қызмет өткерген) және Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен марапатталмаған адамдар;
- меншiгiнде мотоколяскалары мен автомобильдерi бар мүгедектер — салық салу объектiсi болып табылатын бiр автокөлiк құралы бойынша;
- Кеңес Одағының Батырлары, Социалистiк Еңбек Ерлерi, «Халық қаhарманы», «Қазақстанның Еңбек Ері» атақтарына ие болған, үш дәрежелi Даңқ орденiмен және «Отан» орденiмен наградталған адамдар, «Батыр ана» атағына ие болған, «Алтын алқа» алқасымен марапатталған көп балалы аналар көлік салығын төлеуден босатылады.
Аталған азаматтардың барлығына бір жыл ішінде тұрғылықты жері бойынша орналасқан мемлекеттік кірістер басқармасына жеңілдік алу құқығын растайтын құжаттардың түпнұсқасы мен көшірмелерін өткізу керек.
Комментариев: 0