Қазақстанда жаңа көліктердің бағасы үнемі өзгеріп отырады, биыл да сол үрдіс қайталанды. Кейбір ерекше жағдайда немесе қысқа уақытқа арзандайтыны болмаса, машина көбінесе қымбаттайды. Бірақ биыл көліктің қымбаттауы емес, автосалонда аздығы басты мәселе болып отыр, жаңа машинаны бір айдан бір жылға дейін күтуге тура келеді. Бұл жағдай бағаның өсуіне әсер ететіні және алыпсатарларға тиімді болатыны анық.
Бұған мысал ретінде су жаңа Land Cruiser 300-ді айтуға болады. Kolesa.kz-те алдын ала тапсырыс арқылы алынған жол талғамайтын көліктер сатылып жатыр, оның үстіне олар ресми құнынан кемінде 10 миллион теңгеге қымбат.
Ресми баға тізімінде көрсетілмеген дилерлік қосымша жабдықтар да бағаға айтарлықтай әсер етеді. Автокөлік сатып алушылар кілемше, желқағар, дабыл жүйесі сияқты заттарды сатып алуға міндеттеледі. Машина қаншалықты тапшы болса, автосалондар ұсынатын қосымша дүниелер сонша көбейе түседі.
Биыл алғашқы 8.5 айда жаңа көліктер қанша қымбаттағанын білу үшін бінеше танымал модельді мысалға алып қарастырамыз. Елге 2020 жылы оралып, бірден автонарық көшбасшысына айналған Chevrolet-ден бастайық. «Шевроле» дилерлері шілдеде 3094 машина сатты (Hyundai-ге қарағанда мыңнан аса көлікті артық өткізді).
Chevrolet
Chevrolet-нің Қазақстандағы негізгі бестселлері — Cobalt пен Nexia. Қазір салонда «Кобальт» 4.8-5.7 миллион теңге аралығында сатылып жатыр, ал жыл басында олар 4.2-5.2 миллионнан саудаланған. Яғни, қаңтар мен тамыз аралығында модель комплектациясына байланысты 500-600 мың теңгеге қымбаттады.
Nexia да арзан емес. 2021 жылдың алғашқы айларында қарапайым жиынтықтағы төрт есікті көлік (1.5 литрік мотор мен механика) 3.8 миллион теңге, ал үздік комплектациядағы машина (автомат) 4.7 миллион теңге тұратын. Тамызда «Нексияның» құны 200-400 мың теңгеге өсті. Көктемнің басында 2021 жылы шыққан көліктер автосалондарға жеткізіле бастағанда баға бірден көтерілді.
Hyundai
Hyundai 2021 жылы Қазақстандағы екінші танымал марка болды. Кореялық марканың ең өтімді моделі — бюджеттік Accent. Қаңтарда 1.4 литрлік моторы мен механика қорабы бар машина (Active Plus комплектациясы) 6 миллион, ал Elegance жиынтығындағы көлік (1.6 литрлік мотор мен автомат) 7.1 миллион теңге болған. Қазір «Акцент» 6.4 миллионнан (+6.7 %) 7.5 млн теңгеге (+5.6 %) дейін саудаланып жатыр.
Маусымның аяғында жаңа буыны сатылымға шыққан Hyundai Tucson кроссоверінің бағасы да айтарлықтай өсті. Жыл басында олар 10.1-13.8 миллион аралығында болса, қазір 11.2-16.2 миллион теңге тұрады.
Үздік комплектациядағы Tucson бірден 2.4 млн теңгеге қымбаттағандай көрінуі мүмкін, бірақ олай емес. Буын алмасқанға дейін модельдің ең қымбат нұсқасы High-Tech болатын, ал қазір одан да үздік Luxe нұсқасы бар. High-Tech жиынтығының моторы өзгеріп (бұрын — 1.6 турбо, қазір — 2.5 GDI), бағасы 1.5 млн теңгеге өсті. Әрине, бұл да аз емес.
Kia
Жаңа дистрибьютормен жұмыс істей бастаған Kia-ның бірнеше моделі ең өтімді машиналар тізіміне енді. Rio шілде айында үздік бестіктен, ал Sportage жетінші орыннан көрінді.
Kia Rio-ның бағалар тізімі қазір 6.5 миллионнан емес, 6.3 миллион теңгеден басталады. Осыған қарап седан арзандағандай көрінеді. Шын мәнінде олай емес, модельдің бұрынғыдан да қолжетімді Classic комплектациясы пайда болды. Ал тең жиынтықтағы «Рио» 250 мың теңгеге қымбаттап, бағасы 6.8 миллионға жетті.
Модельдің өзге нұсқалары да қымбаттаған. «Бипэктегі» бағамен салыстырғанда қазіргі құны 50-200 мың теңге жоғары. Мысалы, Premium қазір 8 390 000 теңге тұрады, ал жыл басындағы бағасы 8 340 000 теңге болатын.
Sportage арзандады. Алдыңғы жетекті Comfort нұсқасының жарық көруіне орай, бастапқы баға 10 миллион теңге болды. Бұған дейін тек толық жетекті түрленімдер бар еді, әрі баға 11 миллионнан басталатын. Ұқсас нұсқадағы көліктердің бағасы бұрынғыдай. Ал кейбірі арзандады: Luxe (2.0 AWD) қазір 11.7 млн емес, 11.3 млн тұрады.
Қымбаттағандары да бар. Мысалы, ең үздік Premium Black Edition 14 миллионға бағаланып отыр, ал жыл басында қарапайым Premium нұсқасы 13.6 миллион теңге тұрған. Бағасы бұрын 12.7 млн болған 2.4 литрлік моторы бар Prestige қазір 12.8 миллион тұрады.
Toyota
Бірнеше жыл бұрын Toyota Қазақстан нарығында талассыз көшбасшы болатын, жүрілген көліктер саласында ғана емес, жаңа автомобиль сатуда да жапон брендіне ешкім тең келмейтін. Toyota қазір автосалонда сатылатын көліктер арасында көшбасшы емес. Бірақ әлі өтімді маркалар қатарында.
Сатылым бойынша марка үздігі — Camry. 2021 жылы XV 70 рестайлингтен өтіп, жаңа мультимедиа жүйесі мен басқа мотор орнатылды. Машина жаңарған соң құны да өсті. Бірақ бұл бағаның екінші рет көтерілуі болатын. Алғаш ақпанда 2021 жылғы көліктер жарық көргенде қымбаттаған еді.
Жыл басында Toyota Camry алу үшін 10.9 миллион теңге төлеуге тура келді. Бұл сомаға седанның 2.0 литрлік моторы бар «Стандарт» нұсқасы ұсынылды. 2.5 литрлік мотор қойылған («Комфорт») көлік 12.4 млн, ал үздік нұсқадағы «Люкс 3.5» 18.9 млн теңгеден сатылды. Тамызда ең қарапайым «Камри» 13.7 % қымбаттап, 12.4 млн теңгеге бағаланды. «Комфорт» (2.5 литрлік мотор) 14.5 %-ға (14.2 млн) қымбаттады, ал «Люкс» нұсқасын алу үшін 12.3 % (21.2 млн) артық ақша жұмсауға тура келеді.
Биыл жазда буын алмастырған Land Cruiser «тойотаның» Camry-ден кейінгі танымал моделі болар еді, бірақ жол талғамайтын көлік жетпей жатыр, оны сатып алғысы келгендер бір жыл күтуге мәжбүр. Сондықтан оның орнын RAV4 кроссовері басып, шілдеде үздік ондықтан көрінді.
Кроссовердің 2.0 литрлік моторы бар ең қолжетімді «Комфорт» нұсқасы 9.7 %-ға, ал 2.5 литрлік моторы қойылған «Люкс 2.5» жиынтығы 9.2 %-ға қымбаттады. Теңгемен айтсақ, сәйкесінше 12.8 миллионнан 14 миллионға, 18 миллионнан 19.6 миллионға өсті.
Lada
Lada — «Бипэк Автодан» шыққан екінші марка. 2021 жылы сәуірде жаңа автосалондар ашылып, баға өзгерді.
Kia секілді кейбір модельдің бастапқы бағасы төмендеді (мұнда да қолжетімді комплектация жасалды). Кейін баға айтарлықтай өсті, бірақ күздің басында жағдай күтпеген жерден өзгерді, әсіресе «Грантаға» байланысты.
Жыл басында 3.7 млн теңге болған Lada Granta седанының Classic (21901-567-A1) нұсқасы тамыздың ортасында 4.4 миллионға бағаланды. Бірақ қазір көлік құны қайтадан 3.7 млн теңгеге төмендеп отыр.
Автомат қорабы бар Luxe (21902-547-А2) комплектациясы алдымен 1 миллион теңгеге (4.6 миллионнан 5.6 миллионға) қымбаттады, ал қыркүйекте баға қайтадан 4.8 миллионға түсті.
Lada Vesta седаны биыл қаңтарда тек үш комплектацияда ұсынылды: Standard және Classic Start-тың екі нұсқасы (механика және робот). Соңғы екеуі сәйкесінше 5 млн және 5.8 млн теңге болған. Енді олар 5.8 және 7 миллионға бағаланып отыр. Бірақ бұдан да қымбаты бар. Ең үздік нұсқадағы көлік (Comfort GFL44-C67-51) 7.2 млн теңге тұрады.
Комментариев: 0