Сәуір айын қазақстандықтар қатаң карантин режимінде өткізді. Автосалондар жұмысын тоқтатып, көлікті қолдан алу және оны онлайн рәсімдеу мүмкіндігі ғана қалды. Жағдайды пайдаланбақ болған сатушылар тауар бағасын мың құбылтты.
Сәуір айында kolesa.kz-те ұсынылатын ең танымал көліктердің орташа бағасы қалай өзгергенін қарастырайық. Машиналарды біз бірнеше сегментке бөлдік.
Үш млн теңгеге дейін
Құны үш миллион теңгеден аспайтын машиналар қатарында ВАЗ-2114, Audi 100 (C4), сонымен қатар Volkswagen Passat B3 бар. Үш автокөліктің екеуінің жасы отызға таяп қалған.
ВАЗ-2114
2013 жылғы ВАЗ-2114 үшін ай басында шамамен 1 507 200 теңге сұралды, ал айдың аяғына қарай көлік құны 1 557 500 теңгеге өсті (+3.4 %). Бірақ ең жоғарғы көрсеткіш (1 568 200 теңге) сәуірдің ортасында байқалды.
Audi 100 C4
Audi 100 (1991 жылғы) 1 390 100 теңгеден 1 437 700 теңгеге қымбаттады (3.4 %). С4-тің орташа бағасы бір ай ішінде 0.1–2.1 %-ға артты.
Volkswagen Passat B3
Volkswagen Passat (1991 жылғы) керісінше, 969 200-ден 943 000 теңгеге арзандады. Алайда бір ай ішінде үлгінің құны тұрақты болмай, бірде 4.3 %-ға құлдыраса, бірде 6 %-ға дейін артты.
Үш миллионнан бес миллионға дейін
Кореялық екі седан — Hyundai Accent және Kia Rio мен жапониялық Toyota Camry XV40 бағасы 3-5 млн теңге тұратын көліктер санатында.
Hyundai Accent
Hyundai Accent (2014 жылғы) айдың басында 4 млн теңгеден сәл төмен ақшаға саудаланды. Темір тұлпардың бағасы күн сайын қымбаттап, жиырмасыншы сәуірге қарай 4 080 600 теңге межесіне жетті де, ай соңына дейін осы деңгейде қалды. Нәтижесінде Accent құны 2.2 %-ға көтерілді.
Toyota Camry XV40
Бұл санаттағы ең жоғарғы сұранысқа ие Toyota Camry XV40 2007 жылы шығарылған. Ай басында орташа құны 4 641 200 теңгені құраған «қырқыншының» ,бағасы бір аптадан кейін аспандай бастады. Дегенмен 27 сәуір күнгі жағдайға зер салсақ, оның құны небәрі 40 мың теңгеге, яғни 0.9 %-ға өскені байқалады.
Kia Rio
Сәуірде Kia Rio сәл (0.1 %) арзандады, бірақ бұл ең төмен көрсеткіш емес. Седанның құны наурыздың екінші жартысында-ақ құлдырай бастаған, ал сәуірде 4 027 800 теңгеге сатылды. Сол уақыттан бері «Рионың» бағасы қайта көтеріліп келеді.
Бес миллионнан жеті миллионға дейін
Бұл санатқа Toyota Camry XV50, Сorolla седандары мен Lexus RX 330 кроссовері енді.
Toyota Camry XV50
2012 жылы шыққан Toyota Camry өткен айда 7 458 000-нан 7 469 900 теңгеге (0.2 %) қымбаттады. Өзгеріс онша көп емес, алайда 20 сәуірде 7 499 400 теңгеге көтерілді де, ай аяғына дейін сол деңгейін сақтап қалды.
Toyota Corolla
E170 индексіндегі Toyota Corolla 2013 жылы жарық көрген. Сәуірде оның құны 5 749 200-ден 5 665 500 теңгеге төмендеді (-1.5 %). Мамырдың аяғына дейін қалпына келуі әбден мүмкін. Себебі машина бағасы сәуірдің ортасына дейін 5 586 000 теңге межесіне жетті де, артынша қайта өсе бастады.
Lexus RX 330
Осы санатта қарастырылатын жалғыз кроссовер — 2004 жылғы Lexus RX 330. Ол сәл арзандап, 5 997 000 теңгеге сатылуда. Бірақ бір ай ішінде үлгінің бағасы мың құбылды. Ай басында құны күрт өскен машина 6 089 800 теңгеге бағаланса, кейін қайта құлдырап, алдымен 0.2 %-ға, артынша бірден 2 %-ға түсіп кетті.
Жеті миллион теңгеден жоғары
Бұл санатқа Toyota-ның Camry XV70, LC Prado және Land Cruiser үлгілері кірді.
Toyota Camry XV70
Сәуір қорытындысы бойынша «жетпісінші» үлгінің құны 0.4 %-ға, яғни 12 407 300-ден 12 463 700 теңгеге өсті. Бірақ бір ай ішінде көлік бағасы сан мәрте өзгерді: бастапқыда 0.6 %-ге артса, біраз уақыттан кейін 0.7 %-ға төмендеді де, артынша 0.5 %-ға артты.
Toyota Land Cruiser 200
2008 жылғы Toyota Land Cruiser 200-дің бағасы еш өзгермеді деуге болады. Ай басында сатушылар бұл темір тұлпар үшін 12 225 800 теңге сұраса, ай аяғында 12 200 300 ол теңгеге сатылды. Сәуірдің басында бірден 1.2 %-ға арзандағанмен, кейін қайта көтеріле бастады.
Toyota Land Cruiser Prado
Әдеттегі Land Cruiser сияқты, біз шолу жасап отырған Prado-ның (2007 жылғы) да орташа бағасы аса құбылған жоқ. Үлгі 8 600 500-ден 8 590 100 теңгеге арзандады, бірақ айды апталарға бөліп қарастырсақ, оның құны бастапқыда 2 %-ға артып, кейін қайта қазіргі деңгейге түскенін байқауға болады.
Қолда бар деректерге сүйенсек, бағасы үш миллионнан аспайтын көліктер санатында ғана айтарлықтай өзгеріс байқалды. Басқа санаттарда баға айырмашылығы 1 % шамасында.
Мамыр айының басында бірқатар өңірлерде мамандандырылған ХҚКО қайта ашыла бастады. Кейбір жерлерде автокөлікті қайта тіркеу қызметі көрсетіліп жатыр, мұның мамырдағы екінші нарыққа әсер ететіні анық.
Комментариев: 0