Оқиға 26 қазан күні Алматы облысының Еңбекшіқазақ ауданына қарасты Бәйтерек ауылында болған. Жергілікті Полиция департаментінің баспасөз қызметі хабарлағандай, рөлінде кәмелетке толмаған азамат отырған Mercedes Benz CLS-ті тәртіп сақшылары Алматы — Көкпек — Көктал тас жолында тоқтатқан. Көп ұзамай ол жерге 52 жастағы көлік иесі келеді де, ештеңе түсіндірместен, рөлге отырып, оқиға орнынан қашуға тырысады.
Полицейдің оны тоқтатпақ болып, есікке жармасқанына қарамастан, тәртіп сақшыларының қызметтік көлігін соғып, полицейді 50 метрге сүйреген жүргізуші ақыры ол жерден ізін суытады. Қашқын көп ұзамай қолға түсті. Енді билік өкіліне бағынбағаны үшін ер адам 2 000 АЕК көлемінде айыппұл арқалауы мүмкін, не болмаса 600 сағатқа дейін қоғамдық жұмыстарға тартылады немесе екі жылға дейін бас бостандығы шектеледі не сол мерзімге бас бостандығынан айырылады (ҚР ҚК-нің 379-бабы). Ал кәмелетке толмаған «жүргізуші» әкімшілік жауапкершілікке тартылады. Күдіктінің әрекетінен зардап шеккен полицей медициналық жәрдем алғаннан кейін жұмысын әрі қарай жалғастырды.
Комментариев: 0