Астанада келеңсіз жағдай болғанын Polisia.kz хабарлады. Сарыарқа ауданындағы полиция бөліміне 13 адам шағым айтып барған. Олар жүргізуші куәлігін сатып алмақ болып, сан соғып қалған екен.
Алаяқтар қарапайым схемамен жұмыс істеген. Telegram желісіне емтихан тапсыруға көмек береміз деп жазады. Жоспар бойынша клиенттер арнайы ХҚҚО-ға барып, ойына келген жауапты белгілесе де, тест нәтижесі жақсы шығуға тиіс еді. Бұл қызмет тегін көрсетілмегені анық. Оңай құжат аламыз дегендер 50 мыңнан 350 мыңға дейін ақша санап беріпті.
Полиция алаяқтарды ұстады. Заңсыз бизнеспен 27 және 33 жастағы ек азамат айналысыпты. Қылмыскерлер бөтен адамның атына карта ашады, ал ақша алуға жасөспірім көмектескен. Қазір Қылмыстық кодекстің 190-бабына сәйкес тергеу жүріп жатыр. Ұсталғандар бұрын да істі болғандықтан, 10 жылға дейін қамалуы мүмкін.
Бірақ қызығы бұл емес. Заңсыз құжат алмақ болғандар жазасыз қалды. Олар жүйені алдап соғамыз деп жер сипап қалғанын түсінгенде, қаймықпастан арыз жазуға барған. Соған қарағанда халық үшін де, мемлекеттік жүйе үшін де жүргізуші куәлігін сатып алу үйреншікті жағдай болып кеткен сияқты.
Комментариев: 0