Жолдағы қызыл түсті бүтін сызық нені білдіреді

Көкшетау — Атбасар трассасында ұзындығы 6 км болатын қызыл сызық пайда болды. Жол жөндеушілер оны қауіпті саналатын 52—54-шақырымға және 65—76-шақырымға сызған. Жаңа таңба жолдың ортасына және қауіпті бұрылыстар бар жерлерге сызылған. Түнде немесе ауа райы қолайсыз кезде бұл бөлікпен жүру қиын.

«Қазавтожол» ҰК" хабарлағандай, жаңа таңба жарықты жақсы шағылыстырып, жолды анық көруге мүмкіндік береді. Соның арқасында жүргізушілер қауіпті бөлікті дұрыс байқап, қозғалыс траекториясын сақтай алады.

Жаңа жол таңбасы заңды ма, оны кесіп өтсе не болады?

Жол ережесінде қызыл түсті бүтін сызық жоқ. Онда көлденең таңба, соның ішінде бүтін сызық (1.1) ақ немесе сары болады деп жазылған. Бірақ ҚР СТ 1412-2017 стандартына сай, ұлттық немесе мемлекетаралық стандартта жоқ жол қозғалысын реттеу құралын эксперимент ретінде пайдалануға рұқсат беріледі. Ол үшін жүргізушілерге алдын ала ескертіп, жаңа белгінің мақсатын түсіндіру керек.

Демек қызыл сызықты кесіп, қарсы бағытқа шыққан жүргізуші әдеттегі ақ түсті бүтін сызықты кескенмен бірдей жазаға тартылады. Яғни көлік жүргізу құқығынан алты айға айырылады. Егер қарсы бағытқа шығып, апат жасаса, тоғыз ай көлік тізгіндей алмайды.