Бұған дейін «Жол қозғалысы туралы» заңға электросамокатқа қатысты өзгеріс енген. Заң шыққан соң жол ережесіне түзету енгізу қажет болды. ҚР ІІМ Әкімшілік полиция комитеті жол ережесіне енетін жаңа түзетулер әзірледі.
Құжатқа сай жол ережесі мен заңда жаңа ұғымдар пайда болады:
- «электросамокат — екі не үш дөңгелегі бар, электр қозғалтқышпен жүретін, бір адам ғана тасымалдауға арналған, орындығы жоқ, ең жоғары жылдамдығы сағатына 25 км-ден аспайтын жеке мобильділік құралы»;
- «шағын электрлі көлік құралы — электр қозғалтқышпен жүретін, жеке қозғалысқа арналған бір немесе бірнеше дөңгелегі бар көлік құралы, бұл электромотормен жүретін самокат пен мопедті қамтымайды».
Заңда электросамокат жайлы жеке талап белгіленгенмен, полицейлер жол ережесінде мопедшілер мен самокатшыларды бір бөлімге біріктірді. Түзету жобасын әзірлегендер Жол ережесінің 24-тарауын «Мопед, электросамокат, велосипед, шағын электрлі көлік құралы, ат арба қозғалысы және жануарларды айдауға қойылатын қосымша талаптар» деп атауды ұсынды.
Жаңарған жол ережесінде мопедшіге веложол, веложолақ, жол жиегі, тротуар немесе жаяу жүргіншілер жолымен жүруге тыйым салынады. Яғни, мопедші автомобиль жолымен ғана жүре алады. Ал самокатшы веложол немесе веложолақпен жүруге міндетті. Олар болмаса:
- осы тармақтың 2-бөлігінде белгіленген талапқа сай жолдың оң жақ шетімен, қоғамдық көлікке арналған жолақ бойымен;
- жол жиегімен;
- сағатына 6 км-ден аспайтын жылдамдықпен тротуар немесе жаяу жүргіншілер жолағымен жүру қажет.
Сондай-ақ 18 жасқа толған, кез келген санаттағы жүргізуші куәлігі бар адам ғана электросамокат мініп жолдың жүріс бөлігімен жүре алады. Жүргізуші куәлігін өзімен бірге алып жүрудің қажеті жоқ. Автомобилист сияқты смартфоннан көрсетуге болады.
Жол ережесіне өзгеріс енгізу жобасына сәйкес мопед, электросамокат және велосипед жүргізушілеріне:
- рөлді кем дегенде бір қолмен ұстамай жүргізуге;
- жолаушы тасуға (жолаушы тасуға арналған арнайы құрылғысы бар велосипед пен мопедті қоспағанда);
- жүк тасуға (жүк тасуға арналған арнайы құрылғысы бар велосипед пен мопедті, сондай-ақ ұзындығы мен ені 50 сантиметрден аспайтын, алып жүргенде қиындық тудырмайтын жүктерді қоспағанда);
- трамвай жолы бар және бір бағыттағы жолақ саны бірден көп жолда солға немесе кері бұрылуға;
- мопед, электросамокат, велосипед сүйреуге (мопед және велосипедпен сүйреуге арналған тіркемені қоспағанда);
- көліктен түспей жаяу жүргіншілер өткелімен жолды кесіп өтуге;
- жол бойында шлемсіз жүруге;
- қараңғы уақытта өзге көлік жүргізушісіне көрінетін жарық шағылыстыратын зат тақпай жол бойында жүруге тыйым салынады.
Шағын электрлі көлік құралы жүргізушісіне:
- рөлді тым болмаса бір қолмен ұстамай жүргізуге (кейбір рөлі жоқ шағын электрлі көлік құралын қоспағанда);
- жолаушы тасуға;
- жүк тасуға;
- жолдың жүріс бөлігімен жүруге;
- жақын жерде велосипед жолы бола тұра, тротуар не жаяу жүргіншілер жолағымен жүруге;
- шағын электрлі көлік құралын өзге шағын электрлі көлік құралымен сүйреуге;
- шағын электрлі көлік құралынан түспей жаяу жүргіншілер өткелімен жолды кесіп өтуге тыйым салынады.
Жол ережесінің бұл бөлігінде аса үлкен өзгеріс жоқ, мұндай тармақ бұрыннан бар болатын, оны жаңа көлік түрінің шығуына орай толықтырды.
Сіздің ойыңызша жаңадан енген өзгеріс қаншалық пайдалы болады? Пікір жазыңыз.
Комментариев: 0