Өнеркәсіпті дамыту қорының өкілдері брифингте қазір БЦК, Халық банкі мен Еуразиялық банк несиеге өтінім қабылдап жатқанын айтты. Бүгін бағдарламаға ForteBank қосылуға тиіс.
Бір аптада қаржы ұйымдары жалпы сомасы 35.7 млрд теңге болатын 4834 өтінішті мақұлдап, 34 көлікті иесіне табыстаған. Сөйтіп Нұр-Сұлтанда — 11, Алматыда — 3, Ақтөбе облысында — 3, Алматы облысында — 1. БҚО-да — 1, Жамбыл облысында — 4, Павлодар облысында — 4, Шымкентте 6 азамат машиналы болды.
Жоспар бойынша отандық 10 мың машина жеңілдікті несие арқылы сатылады. Қор қызметкерлері қазір қоймада 8 мыңға жуық машина барын айтады, ал маусымда зауыт мамандары тағы 8-9 мың көлік құрастырады. Сондықтан төмен пайызбен несиеге алуға болатын көлік тапшы болмайды. Қор өкілдерінің сөзіне сенсек, бағдарлама техниканың қымбаттауына тікелей әсер етпеуге тиіс. Баға басқа себептерге байланысты шарықтауы мүмкін.
Сонымен қатар бағдарламаға біраз түзету енгізілгенін атап өтті. Енді автомобильдің VIN-коды сұралмайды және КАСКО полисін бүкіл несие мерзіміне емес, бір жылға қосуға рұқсат берілді. Машинаны күту мерзімі 1.5 айға дейін қысқарды, сақтандыру бағасы төмендеп, клиенттің келісімінсіз қосымша жабдық орнатуға тыйым салынды.
Комментариев: 0