Жазда қысқы дөңгелекпен жүрген өте қауіпті. Көлікті асфальтта шұғыл тежеген кезде бүртабан дөңгелек оңай таяды. Сондықтан жазда қысқы дөңгелекті пайдалануға Кедендік одақтың «Дөңгелекті көлік құралдарының қауіпсіздігі туралы» техникалық регламенті мен ҚР жол ережесі тыйым салады.
Ереже бұзғандар Әкімшілік кодекстің 590-бабы 5-бөлігі бойынша 5 АЕК (14 585 теңге) көлемінде айыппұл төлейді. Ал бір жыл ішінде осы ереже қайта бұзылса, онда айыппұл көлемі 20 АЕК болады.
Солтүстік Қазақстанда бір күн бұрын профилактикалық шара өтіп, жүргізушілерге көлік дөңгелегін ауыстыру ескертілді. Биыл СҚО-ға көктем кеш келгендіктен, қысқы дөңгелекпен жүрген машиналар әлі көп. Бірақ басқа аймақтарда да мұндай «ұмытшақ» немесе жауапсыз жүргізушілер жетерлік.
Кедендік одақтың 018/2011 техникалық регламентінің 5.5-тармағына сай «жазда (маусым, шілде, тамыз) қысқы дөңгелекпен жабдықталған көлік құралын басқаруға тыйым салынады. Ал қыста (желтоқсан, қаңтар, ақпан) осы қосымшаның 5.6.3-тармағындағы талапқа сәйкес келетін қысқы дөңгелекпен жабдықталмаған М1 және N1 санатындағы көлік құралын басқаруға болмайды».
Жол ережесі бойынша «жол жүрісі қауіпсіздігіне және қоршаған ортаға қатер төндіретін техникалық ақаулар мен жағдайлар болған, көлік құралдары оларды техникалық пайдалану жөніндегі тиісті техникалық регламенттерге, стандарттарға, қағидалар мен нұсқауларға сәйкес келмеген, сондай-ақ оларды тиісті келісусіз қайта жабдықтаған» жағдайда көлік жүргізуге тыйым салынады.
Комментариев: 0