Жапонияда ескі «Ниваға» сұраныс артты

Shot telegram-арнасы Жапонияда қызық құбылыс байқалғанын хабарлады. Дилерлер жергілікті тұрғындардан «Нива» сатып алып, Ресейдегі жаңа машинадан қымбатқа қайта сатып жатыр.

Жергілікті Goo-net және CarSensor хабарландыру сайтының мәліметінше жүрген Lada 4×4 шыққан жылы мен жағдайына қарай 1.58–2.88 млн иен (4.51–8.22 млн теңге) тұрады. Мұндай ақшаға Жапонияда соңғы буындағы Toyota RAV4 немесе су жаңа Suzuki Jimny алуға болады.

Жол талғамайтын көлікті жеткізу процесі 2022 жылы көктемде тоқтаған, модельге сұраныстың артуына осы жағдай себеп болып отыр. Жапонияда «Нива» мінгісі келетіндер әлі бар. Сондықтан олар екінші нарықтан іздеуге мәжбүр.

Саудагерлер осыны пайдаланып, жүрген «Нива» тауып, сатып алып, кейін қайта саудалап жатыр. Әрине мұнда жүздеген машина жайлы әңгіме болып отырған жоқ. Мысалы, Нагоя қаласындағы AutoRiesen орталығы қазанда осындай жолмен екі Lada 4×4-тің кілтін тапсырған. Күншығыс еліндегі ВАЗ саудасы үшін бұл нашар көрсеткіш емес.