Жапонияда бес автоөндіруші сынақ нәтижесін бұрмалаған

Былтыр жыл аяғында Жапонияда краш-тест нәтижесі бұрмаланды деген ақпарат шығып, арты дауға айналған-ды. Жуырда тергеу нәтижесін жария еткен Көлік министрлігі Toyota, Suzuki, Mazda, Honda және Yamaha компанияларын сынақ нәтижесін бұрмалады деп айыптап, қазір шығып жатқан алты модельді сатуға тыйым салды.

Toyota-ға автомобильдің жаяу жүргіншіні қорғауға қатысты сынақтары туралы жалған мәлімет берді деген айып тағылса, Honda компаниясының қозғалтқышқа арналған бағдарламасынан кемшілік тапқан. Одан бөлек билік екі өндіруші де краш-тест өткізгенде алдын ала түрленген машина пайдаланды деп санайды.

Toyota өндірістен алып тастаған Crown, Isis, Sienta және Lexus RX модельдері мен қазір шығып жатқан үш көлікке қатысты ереже бұзу дерегі тіркелді. Yaris Cross, Corolla Fielder және Axio белгісіз мерзімге дейін саудаланбайды. Mazda өндіретін MX-5 моделінің бір нұсқасы мен Mazda2 шағын хетчін сауда сөрелерінен алып тастады.

Yamaha мен Honda шу сынағының нәтижесін бұрмалады деген күдікке ілінді. Құзырлы орган Yamaha-ның үш моделін сатуға шектеу қойды, ал Honda 22 жағдайда заң бұзыпты. Suzuki бір өнімінің тежеуіш жүйесін тексергенде берілетін хаттаманы қолдан жасағаны анықталды.

Көлік министрлігі автоөндірушілерді дереу сынақ нәтижелерін ұсынып, жаңадан сертификация жүргізуге міндеттеді. Билік енді зауыттарды аралап, тексереді, кінәсі дәлелденген мекемелерді заңға сәйкес жауапқа тартады. Былтыр Daihatsu-дан басталған тергеу жұмысы әлі аяғына жеткен жоқ. Бастапқыда шара 85 компанияны қамтуы керек еді, қазір тексерістен өтпеген 17 марка қалды. Toyota мен Honda жалған мәлімет бергенін ресми түрде мойындады, бірақ ол сатылып кеткен көліктердің қауіпсіздігіне еш әсер етпейтінін атап өтті.