Toyota концерні жолаушы жақтағы қауіпсіздік жастығынан шыққан ақауға байланысты бірнеше модельді кері шақырады, кампания 1.12 млн машинаны қамтиды. Оның көбі АҚШ-тағы көліктер. Ал Жапонияда Toyota мен Daihatsu ондаған модельді сатуды тоқтатады, бұған да қауіпсіздік жүйесіндегі ақау себеп болған.
Солтүстік Америкада кампания Toyota Avalon, Camry, Corolla, RAV4, Highlander, Sienna және Lexus ES пен RX-тің кейбір түрленімін қамтиды. Олар 2020–2022 жылдары шыққан. Бұл автомобильдердің жолаушыға арналған алдыңғы қауіпсіздік жастығы жүйесінде жолаушыны тану сезгегі бар: ол жолаушы денесін бағамдап, эйрбэг жұмысын реттейді. Сезгекте қысқа тұйықталу болып, істен шығуы мүмкін. Салдарынан апат болған кезде жолаушы жақтағы қауіпсіздік жастығы дұрыс жұмыс істемей, адам жаралануы мүмкін.
Тойота миллионнан аса автомобильді тексеріп, қажет болса сезгекті ауыстырады.
Ал Daihatsu Жапонияда бірнеше модельдің саудасын тоқтатты, оған көктемдегі компания краш-тест нәтижесін бұрмалады деген дау себеп болып отыр. Тәуелсіз тергеу нәтижесінде біршама қателік анықталды.
Daihatsu ақау шығуы мүмкін көліктерді сатуды тоқтатты. Ақау 64 модельден табылды, оның 22-сі Toyota брендімен шыққан. Олардың арасында Pixis, Copen, Roomy, Town Ace, Probox, Passo және Yaris түрленімдері бар.
Екі компания да ақауға байланысты апат болғаны жөнінде ақпарат жоқ екенін хабарлады. Техникалық тексеріс басталды, компания қандай шара қолданатыны кейін белгілі болады.
Комментариев: 0