2020 жылдың орта тұсында Volkswagen жаңарған Tiguan-ды таныстырды. Жаңа көлікті шамынан, бампері мен ірі радиатор торынан танисыз. Салонында климат жүйесінің сенсорлы басқару блогы мен Apple CarPlay және Android Auto қосылатын мультимедиа кешені көз тартады. Нұсқасына қарай экран диагоналі 6.5-9.2 дюйм аралығында.
Біздің елге жарты жылдан кейін жеткен жаңа көлікті сатып алушылар 150 ат күшіне ие 1.5 литрлік және 180 не 220 ат күшін беретін 2 литрлік бензинді моторлар арасынан таңдау жасайды.
Төрт жиынтықта ұсынылатын көліктің алдыңғы жетекті ең қарапайым нұсқасы 6 сатылы DQ250 роботымен жұмыс істейтін 1.5 литрлік мотормен жабдықталады. Бағасы — 11.4 млн теңге. Бұл ақшаға қарапайым медиажүйе, үш аймақты климат-бақылау орнатылған, салоны матамен қапталған, орындықтары қолмен реттелетін, алдыңғы және бүйірлік жастықтары мен бірнеше қауіпсіздік жүйесі бар көлікке иелік етесіз. Қосымша ақша төлеп, қысқы пакет пен 8 дюймдік экраны бар бас құрылғы алуға болады.
Толық жетекті жүйе тек 2 литрлік қозғалтқышы бар машинада қолжетімді. Олар 7 сатылы DQ500 роботымен жабдықталады. Мұндай көліктің ең арзаны 13.2 млн теңге тұрады. Ал 220 ат күшіне ие үздік R-Line нұсқасындағы кроссовер үшін 15.8 млн теңге санап беруге тура келеді. Қымбат көліктің салоны былғарымен қапталады, бейімді оптикасы мен цифрлы аспаптар панелі болады. Бұл артықшылықты сәл арзан (14.2 млн теңге) Exclusive-тен де табасыз.
Комментариев: 0