Volkswagen Teramont-тың жаңарған нұсқасы 2020 жылдың басында таныстырылған. Оның тұсаукесері модель Atlas деген атаумен танымал АҚШ-та өтті. Сырттай жаңа көлікті өзге радиатор торынан, бампері мен шамынан танисыз.
Біздің елде кроссовер төрт комплектацияда, екі күштік құрылыммен (220 ат күшіне ие турбомотор және 249 күш беретін 3.6 литрлік VR6) ұсынылады. Соңғысы тек үздік R-Line нұсқасында қолжетімді. Екі мотор да 8 сатылы автоматпен және 4motion толық жетек жүйесімен жабдықталады.
Ең арзан Respect-тің өзі ESP, ABS, ASR, дифференциалды электронды бұғаттау, автоматты тежеу, көрінбейтін аймақтарды бақылау, бейімді круиз-бақылаудан тұратын жүйелермен, бүйірлік қауіпсіздік жастықтарымен жабдықталады.
Стандарт жабдықтар тізімінде үш аймақты климат-бақылау, кілтсіз ашу жүйесі, көп функциялы медиакешен, сымсыз қуаттағыш, алдыңғы орындықтарды, айна, әйнек жуғыш бүріккіші мен рөлді жылытқыш, цифрлы аспаптар панелі бар. Қарапайым Teramont алам десеңіз, қосымша опциялар мен дилер қосатын ақшаны есептемегенде, 21.6 млн теңге жұмсауға тура келеді.
Үздік R-Line нұсқасы 2.0 турбомотормен және VR6-мен қолжетімді. Бағасы 24.4-25.5 млн теңге аралығында. Бұл нұсқа айрықша декорымен және 20 дюймдік R-Line Sebring дискілерімен ерекшеленеді. Мұндай кроссоверге көлемі 10 дюйм экраны бар аспаптар панелі, күрделі жарықдиодты шам, алдыңғы орындықтарды желдеткіш, айнала шолу жүйесі, автоматты тұраққа қойғыш пен тағы бірқатар функциялар орнатылады. Айта кетерлігі, фирмалық декор мен 249 ат күшіне ие моторды қоспағанда, осы аталғанның бәрі Exclusive-те (23.9 млн теңге) бар.
Қосымша ақша төлеп, панорамалы шатыр, екінші қатардағы дербес орындықтар мен автономды жылытқышқа тапсырыс беруге болады.
Комментариев: 0