Жаңарған Kia K8 Қазақстан нарығына шілдеде шығады

Kia былтыр тамызда жаңарған K8 седанын жақында біздің елде ресми сата бастайды.

Рестайлингтен өткен седанның алдыңғы жағы жіңішке жарықдиодты жолақпен біріккен тік шамы брендтің қазіргі фирмалық стиліне сай жасалған. Артқы жағы көп өзгерген жоқ. Дизайнерлер жарық техникасы мен бампер формасын реттеп, жалған газ шығару жүйесін алып тастады.

Модельдің салонында жаңа рөл, 12.3 дюймдік екі дисплейден тұратын планшет, жаңа климат басқару пульті және өзгеше ортаңғы консоль көзге түседі. Компания автомат қорап селекторының шайбасынан бас тартқан жоқ.

Kia K8-ді Қазақстанда бір ғана күштік құрылыммен сатады. Машина 8 сатылы автомат қораппен жұптасатын 3.5 литрлік V6 мотормен жүреді. Әдетте мұндай агрегат тек алдыңғы жетекпен жұмыс істейді, бірақ марка модельдің толық жетекті нұсқасын да ұсынуды жоспарлап отыр.

Компания модельдің нақты комплектациясын әлі жариялаған жоқ. Бірақ опциялар тізімінде автоматты тежеу, жолақта ұстау, көрінбейтін аймақты бақылау сияқты үздік электронды көмекшілер жинағы болатыны белгілі. Жабдықтар тізімінде жылытуға және желдетуге болатын фирмалық Ergo motion креслосы, жылытуға болатын алдыңғы әйнек, екі қабатты бүйірлік әйнек, 14 динамигі бар аудиожүйе, сымсыз қуаттау, USB-C розеткасы, электронды басқарылатын аспа және т.б. бар.

Kia K8-дің бағасы қазірше белгісіз. Машина ресми саудаға 1 шілдеде шығады. Қазақстанда қазір сатылып жатқан К8 24.4–27.4 млн теңге тұрады.