Қазіргі кезде аспан асты елінің брендтері бір модельдің рестайлингтен өткен және рестайлинге дейінгі екі нұсқасын ұсынатынымен ерекшеленеді. Оны Chery-дің Қазақстандағы бестселлер модельдерінің бірі — Tiggo 2-ден байқауға болады. Қаңтар мен шілде аралығында 2.6 мың көлік иесін тапқан.
Стандарт Tiggo 2 елімізде былтырдан бері сатылып жатыр. Автомобиль арнайы ұсыныс пен жеңілдікті есептемегенде 7 млн теңге тұрады және бір комплектацияда қолжетімді. Ол 109 ат күшін беретін 1.5 литрлік мотормен жұптасқан алдыңғы дөңгелектерді айналдыратын вариатормен жабдықталады.
Модельдің жаңарған нұсқасы 2023 жылы мамырда Қытайда Tiggo 3x деген атпен шықса, бізде биыл жазда Tiggo 2 Pro деген атау алды. Шілдеде дилерлер жүзден аса машина сатты, бірақ рестайлингтің ресми презентациясы Қазақстанда қыркүйектің ортасында өтті.
Сыртындағы заманауи жарық техникасы сияқты өзгерістерден басқа, кроссовердің қуаты артты. Енді оның атмосфералы моторы 113 ат күшін береді.
Жабдықтар тізімінде қазақ тілді жаңа медиажүйе, кілтсіз ашу жүйесі, жүріс режимінің (Eco, Sport) селекторы, бүйірлік айналарды, рөл мен алдыңғы терезені жылытқыш, электр жетекті айна пайда болды. Автомобильдің Style деп аталатын бір ғана комплектациясы 7.5 млн теңге тұрады.
Комментариев: 0