Жаңа SUNQAR камерасы «Сергектен» артық па?

SUNQAR кешені Алматы — Көкпек — Көктал тас жолының 30-шақырымында, Еңбекші мен Талғарға бұрылатын жер арасында тұр. Алматы облыстық Полиция департаменті хабарлағандай, жақында мұндай құрылғы аймақтағы басқа да қауіпті жол бөліктеріне қойылады.

Техникалық сипаттамасына сай жаңа камера мына әрекеттерді тіркейді:

• бағдаршамның тыйым салынған түсіне өту;
• тоқтау сызығының талабын орындамау;
• теміржол өткелінен өту ережесін бұзу;
• бақылау аймағында жылдамдықты белгіленген шектен асыру;
• орташа жылдамдықты асыру;
• қарсы жолаққа немесе қарсы бағыттағы трамвай жолына шығу;
• бір бағытты жолда қарсы бағытта жүру;
• қоғамдық көлік жолағымен жүру;
• жаяу жүргіншілер өткелінде жаяу жүргіншіге жол бермеу;
• жол белгісі мен жол таңбасы талабын бұзу;
• жүргізушінің қауіпсіздік белдігін тақпауы және қауіпсіздік белдігін тақпаған жолаушыны тасымалдау;
• көлік жүргізіп келе жатып Hands Free құрылғысынсыз телефон пайдалану;
• көліктің сыртқы жарығын жақпау;
• жаяу жүргіншілер өткелінде тоқтау немесе аялдау;
• жол белгісі немесе жол таңбасымен тыйым салынған жүріс бөлігінде тоқтау немесе аялдау;
• тротуарда тоқтау немесе аялдау;
• көлікті тұраққа дұрыс қоймау. Мысалы, жолдың жүріс бөлігіне параллель емес немесе жүріс бөлігінің екінші қатарына қою;
• көлікті көгалға, саябаққа, баққа, алаңға, бульварға, балалар және спорт алаңына қою;
• автотұрақ ережесін бұзу;
• бүтін сызықты басып өту;
• веложол, жаяу жүргіншілер жолы немесе тротуармен жүру;
• тыйым салу белгісі бар жермен жүру;
• қоғамдық көлік құралына басымдық бермеу;
• жол белгісі немесе жол таңбасы талабын елемей солға бұрылу немесе кері бұрылу;
• көлікті жолдың жүріс бөлігіне қою, қарсы бағытта және жол жиегімен жүру;
• темір жол өткелінің екі жағына 50 метрден жақын жерге көлік қою;
• жол ережесін сақтамай, оңға, солға немесе кері бұрылғанда жүріс бөлігінің осы бағыттағы қозғалысқа арналған шеткі бөлігін алдын ала таңдамау;
• комплектацияға байланысты өзге де ереже бұзу әрекеті.

Жүйе қараңғыда, нашар көрінетін жерде жұмыс істей алады, шетелдік нөмірді таниды және міндетті сақтандыру полисі бар-жоғын автоматты тексере алады.

Полиция Құлжа тас жолындағы «Сұңқар» 13–19 мамырда 20 мыңнан аса ереже бұзған жүргізушіні тіркегенін айтты. Яғни жаңа камераның жанынан өткен әрбір бесінші жүргізуші жол ережесін бұзған. Жабдық негізінен қауіпсіздік белдігін тақпаған автомобилистерді анықтады.

Мұндай функциялар «Сергекте» де бар. Мәселе аппараттың қандай әрекетті тіркеуге бағытталғанына байланысты. Мысалы, бір жердегі камера жылдамдықты, бір жердегі камера қауіпсіздік белдігін тақпағанды тіркеуі мүмкін.