Subaru-дың Америкадағы бөлімшесі Instagram желісінде алтыншы буындағы Forester-дің суретін жариялаған соң жағымсыз пікірлер қарша борады. Бренд жанкүйерлері жаңа Forester бұрынғы «форд» модельдеріне ұқсайтынын айтып, сәтсіз дизайнды сынға алып жатыр.
Пікір жазған оқырмандар машина дизайнын сызған топты жұмыстан қууды ұсынды, сондай-ақ кезінде жақсы жұмыс істеген Subaru компаниясын кім кері тартып жатқанын сұрап жатыр. Бір тұрғын мұндай дизайн фокус-топтың сынағынан қалай өтіп кеткенін түсінбей отырғанын жазды.
Instagram қолданушылары жаңа Forester-дің Ford Explorer сияқты танымал кроссоверлерге ұқсайтынына наразы болып отыр. Жаңа өнімді Explorester, RAV4ester және Honda RAV-explorer деп атап, әзілдеп жатқандар да бар. Кей тұрғын өндіруші Ford эмблемасының орнына Subaru белгісін қоя салған деп айыптады.
Жазба астында жағымды пікірлер де жоқ емес, постқа үш күнде 9 мың адам лайк басыпты. Subaru сын пікірлерге ресми жауап берген жоқ.
Жаңа Forester бірнеше күн бұрын жарық көрген. Машинаның сырт пішіні мен салоны өзгерді (11.6 дюймдік экран бар), ал моторының қуаты кеміп, айналу моменті артты.
Комментариев: 0