L405 индексті Range Rover-дің жарық көргеніне тоғыз жыл өткен соң, компания оның ізбасарын таныстырды. Бесінші буын өкілі L460 деп аталады. Жаңа машина сырттай біз көріп жүрген көлікке ұқсағанымен, техникалық жағында үлкен айырмашылық бар.
L460-тың фотосуреті бұған дейін желіде тарап, біраз құпиясы ашылған еді. Фототыңшылардың арқасында, біз оған жарықдиодты жіңішке шам орнатылатынын, жүксалғыш қақпағы екіжақты және сервожетекті болатынын алдын ала білдік. Оған қоса барлық есікке электромотор қойылды, ал жүргізуші есігі тежеуіш педалін басқанда жабылады.
Суретінен жаңа Range Rover алдыңғы буын өкілінен 53 мм-ге ұзын екені байқалады. Дөңгелек базасы 75 мм-ге ұлғайған.
Салонда Pivi Pro мультимедиа кешенінің 13.1 дюймдік экраны көзге түседі, оның астында климат орнату блогы, сонымен қатар төрт шабақты рөл мен Range Rover Velar-дан алынған автомат селекторы тұр. Аспаптар панелі цифрлы (13.7 дюйм). Мамандар алдыңғы орындықтардың артына да экран орнатыпты.
Range Rover 4, 5 және 7 орынды нұсқада ұсынылады. Орындықтар жылынады және электр жетек көмегімен бүктеледі. Төрт орынды көлік алғанда арқасы 16 градус диапазонда реттелетін орындық немесе диван түрін таңдауға мүмкіндік бар.
Жаңа машина MLA-Flex платформасында жасалған алғашқы модель. Алдыңғы бөлігіне қосарлы көлденең иінтіректер, ал артына көп иінтіректі аспа орнатылған, жаңа схема бойынша мұнда бес иінтірек болады.
Көлікке қаттылығын навигатор дерегіне сай өзгертетін eHorizon жүйесі басқаратын Bilstein бейімді амортизаторлары бар пневматикалық аспа орнатылады. Белсенді тұрақтандырғыш 48 вольттық мотормен жабдықталған. Жолсызбен жүргенде ол өшіп қалады. Артқы дөңгелектері 7.3 градусқа бұрылады.
Капот астында да жаңалық көп. Енді топтамадағы үздік мотор — 530 ат күшіне ие (750 Нм) 4.4 литрлік қосарлы турбоүрлемді агрегат. Немістер жасаған бұл қозғалтқыш — жетілдірілген BMW N63. Сонымен қатар Ingenium топтамасына тиесілі 3 литрлік қатарлы мотор ұсынылады. Ол 249 (600 Нм) және 350 (700 Нм) күш беретін екі түрленімде қолжетімді.
Барлық мотор 8 сатылы ZF автоматымен жұптасады. Айта кетерлігі, инженерлер бұл жолы тұрақты толық жетектен бас тартыпты. Алдыңғы ось көп дискілі муфта арқылы қосылады. Компания өкілдері машина жолсыз жермен жүргенде өте жақсы әсер қалдырғанын атап өтті. Көлікте Terrain Response 2 жүйесі бар, модель тереңдігі 900 мм болатын өткел мен 45 градустық дөңнен қиналмай өте алады.
Жаңа Range Rover нарыққа 2022 жылдың басында шығады.
Комментариев: 0