Жаңа буындағы Lexus LX 2021 жылы қазан айының ортасында таныстырылды, бірақ ол кезде бағасы құпия сақталған. Енді сол құпия ашылды. Дилерлердің бірі Жапония нарығына арналған жол талғамайтын көліктің жиынтық түрлері мен бағасын жариялады.
Қолда бар ақпаратқа сүйенсек, LX 600 жапондарға алдымен үш комплектацияда ұсынылады: Standart, Offroad және Executive. Үш нұсқаға да 415 ат күші мен 650 Нм момент беретін 3.5 литрлік бензинді турбомотор (V6) қойылады. Ең қарапайым LX 12.5 миллион иенге (48 млн теңге) сатылады, ал үздік Executive нұсқасы кем дегенде 18 миллион иен (69 млн теңге) тұрады. Салыстыру үшін айтсақ, Toyota Land Cruiser 300 Жапонияда 5.1-7.7 миллион иен аралығында (19.6-29.5 млн теңге) сатылып жатыр.
Жаңа өнім LX 570-ге қарағанда көп қымбаттаған жоқ. Алдыңғы буынның бағасы 11.4 млн иеннен басталады. Демек ең арзан жиынтықтағы «алты жүздік» 10 %-ға ғана қымбаттаған.
Жаңа LX Қазақстанға 2022 жылы ақпанда келеді. Бағасы әлі жарияланған жоқ. Егер біздің елде де LX 570-ге қарағанда 10 %-ға қымбат болса, жаңа LX-тің бағасы шамамен 55.9 млн теңгеден басталады.
Комментариев: 0