Hyundai биыл маусым аяғында Ioniq суббрендінің атауында 6 саны бар екінші моделін көрсеткен. Ол кезде жаңа өнімнің сыртқы пішіні мен интерьері жайлы ғана ақпарат жарияланды.
Hyundai енді Ioniq 6 туралы толық мәлімет берді. Электромобиль E-GMP платформасында жасалады. Машинаға екі түрлі батарея орнатылады: 53.0 немесе 77.4 кВт/сағ, толық немесе артқы жетекті. Екі электромоторы бар нұсқасы 320 ат күшіне (605 Нм), ал бір моторы бары 225 ат күшіне ие. Сыйымдылығы үлкен батарея орнатылған моножетекті Ioniq 6-ның жүріс қоры 610 км болады. Жылдам қуаттау жүйесін қолданған кезде батареяны 10-нан 80 %-ға дейін толтыруға 18 минут кетеді.
Компания электромобильдің ең жоғары жылдамдығын айтқан жоқ, бірақ үздік нұсқасы алғашқы жүздікті 5.1 секундта алатынын мәлімдеді.
Ioniq 6 салонында 12 дюймдік екі экран мен 64 түсті жарық шығаратын ерекше мүмкіндік назар аудартады. Сондай-ақ опция ретінде ұсынылатын жүргізуші мен алдыңғы жолаушыға арналған жиналмалы креслоны айта кеткен жөн.
Машинада қауіпсіздік жүйесінің заманауи электромобильде болуға тиіс барлық түрі (айнала шолу камерасы, көрінбейтін аймақты бақылау, бейімді круиз-бақылау, автоматты тежеу және т. б.) бар.
Ioniq 6 өндірісі 2022 жылы қыркүйектің аяғында басталады. Бағасы жайлы қазірше ақпарат жоқ.
Комментариев: 0