Жаңа BMW X7-нің электрлі нұсқасы болады

2027 жылы нарыққа шығатын BMW X7 кроссоверінің ізбасары Neue Klasse топтамасына арналған жаңа элементтерімен ерекшеленеді. Бірақ сырт пішіні 7-сериялы седандарға, нақтырақ айтқанда, биыл сәуірдің аяғында Бейжің автосалонында тұсаукесері өтетін көлікке ұқсайды.

Камуфляжбен қапталған машинаның суретінен X7-нің дәстүрлі сұлбасы мен үлкен «танауы», екі деңгейлі жарық техникасы (үстінде күндізгі жүріс шамы, астында негізгі шам блогы) бар адыңғы бөлігі өзгеріссіз қалғаны байқалады. Бренд Еуропа мен АҚШ нарығына арналған нұсқаға электр жетекті жасырын есік тұтқасын орнатса, Қытайда саудаланатын түріне дәстүрлі тұтқа қояды.

1 / 8

• 
• 
• 
• 
• 
• 
• 
• 

1 / 8

BMW X7-нің интерьерінде қазіргідей ойыс дисплей болмайды, оның орнын ақпаратты үш деңгейде көрсететін Panoramic iDrive концепциясы басады. Параллелограмм пішінді ортаңғы экран шағын ғана, ол жүргізушіге жақын орналасады. Деректер (жылдамдық, навигация, виджет) алдыңғы әйнектің төменгі бөлігіндегі жіңішке панельден көрінеді, ал кеңейтілген шындық элементі бар 3D-проекция жүргізушіге бағытталған. Ортаңғы консольде дәстүрлі басқару шайбасы жоқ болғандықтан, дауыспен басқару функциясының мүмкіндігі артты.

Машина «жаңа класс» өкілі, бірақ бұрынғы CLAR архитектурасына негізделген. Соған сай жұмсақ гибрид жүйесі бар 3 литрлік қатарлы турбомотормен (B58) және 4.4 литрлік V8-бен (S68) жүреді.

Жаңа өнім модельдің iX7 индексті толық электрлі түрленімі болары анық. Автомобиль туралы ресми ақпарат жоқ, дегенмен Carscoops басылымы оның қуаты 800 ат күшіне, жүріс қоры 800 шақырымға жететінін хабарлады.