Жамбыл облысында жол сапасына жауапты жүздеген шенеунік айыппұл арқалады

Жамбыл облысындағы нашар жолдар үшін 300-ден астам шенеунік жауапқа тартылды. Бұл туралы Жамбыл облысының Полиция департаменті бастығының орынбасары Николай Сонға сілтеме жасап, «Хабар 24» хабарлады.

Осы жылдың басынан бері облыстық трассаларда 15 мыңға жуық кемшілік анықталды. Олар жолдағы жарықтар, шұңқырлар және ескірген жол белгілері. Мамандар 20 мың шақырымға жуық жол торабын тексерді.

Полицейдің айтуынша, облыста жол қауіпсіздігін қамтамасыз етпеген 230 шенеунік жауапқа тартылды. Әкімшілік кодекстің 631-бабының 1-бөлігі бойынша олар 10 АЕК (2023 жылы 34500 теңге) көлемінде айыппұл төлейді. Тағы 70 лауазымды тұлға жолдардың бұзылғаны үшін, 23-і берілген бұйрықты орындамағаны үшін жазаланды. Тәртіп сақшылары Тараз қаласының тұрғын үй-коммуналдық шаруашылығының басшысына қатысты 19 хаттама толтырған.