Кеше, 9 сәуір күні Наурызбай аудандық полиция басқармасына жүгінген азамат Daewoo Nexia көлігін жалға алып, екі күнгі ақысын кешіктіргені үшін көлік иесі мен оның достары өзін соққыға жыққанын және екі ұялы телефонын тартып алып, енді 14 мыңның орнына 40 мың теңге төлейсің деп талап қойғанын айтқан.
Алматы қаласы Полиция департаментінің баспасөз қызметі хабарлағандай, қаскөйлер ақша әкелетін орынды белгілеп, кездесуге төрт адам болып келіпті. Талап етілген соманы беру барысында полицейлер бопсалаушыларды құрықтамақ болады. Бірақ қарсылық танытқан әлгілер екі тәртіп сақшысын ауыр жарақаттап, оқиға орнынан тайып тұрған. Қала бойынша «Тосқауыл жасау» жоспары құрылып, нәтижесінде қылмыскерлердің екеуі қолға түсті, өзгелері іздестірілуде.
Күдіктілер уақытша ұстау изоляторында отыр. Алматы қалалық Полиция департаментінің Тергеу басқармасы ҚР ҚК-нің 380-1 («Құқық қорғау органы қызметкерінің өміріне қолсұғушылық») бабы бойынша сотқа дейінгі тергеп-тексеру жұмыстарын жүргізуде. Жарақат алған тәртіп сақшылары № 7 ауруханаға жедел жеткізіліп, оларға ота жасалған. Қазіргі таңда жағдайлары бірқалыпты, өмірлеріне қауіп төніп тұрған жоқ.
Комментариев: 0