Үкімет басшысы Асқар Мамин төрағалық ететін мемлекеттік комиссия карантинді кезең-кезеңімен жұмсарту жөнінде қаулы шығарды. Комиссия шешімімен 17 тамыздан бастап елдегі сауда орындары (бутиктер), сауда желілері, жабық базарлар ашылады.
Базарлар мен сауда орындарындағы адам саны 30 %-дан аспауы тиіс, яғни адам басына 4 шаршы метр жер болуы қажет. Бірақ оны қалай анықтайтыны белгісіз. Сатып алушылар мен сатушылардың дене қызуы өлшенеді және бәрі бетперде тағып, қашықтық сақтауға міндетті.
Кәсіпкерлер қызметін жалғастыруға рұқсат алу үшін infokazakhstan.kz сайтында өтініш қалдырып, кәсіпорынды тексерістен өткізеді.
17 тамыздан бастап қоғамдық көлік жұмысын тоқтатқан өңірлердегі автобустар қайта жолға шығады. Мұнда да санитарлық нормалар қатаң сақталуы тиіс. Бірақ қала, аудан және облыс арасында қатынайтын қоғамдық көлікке қатысты шектеулер өз күшінде болады.
Карантин режимін жеңілдету кезеңінде қайта ашылған мекемелер демалыс күндері жұмыс істемейді.
«Министр Алексей Цой демалыс күнгі локдаун екі аптаға жалғасатынын айтты. Бизнес негізгі табысты сенбі-жексенбі күндері табады. Біз бұл шараны саналы түрде жүргізіп жатырмыз. Бизнестің жауапкершілігіне көз жеткізгіміз келеді. Егер екі аптадан кейін бәрі жақсы болса, демалыс күнгі локдаун күшін жоюды сұраймыз. Бұл біртіндеп жүзеге асатын процесс. Мұнда адамдардың денсаулығы маңызды рөл атқарады», — деді «Атамекен» ҰКП басқарма басшысының орынбасары Эльдар Жұмағазиев.
Комментариев: 0