Zeekr жеті жаңа модель дайындап жатыр

Zeekr алдағы екі жылда жеті электрокар шығарады. Қытайдағы БАҚ жабық презентацияның желідегі слайдтарынан жаңа өнімдер арасында кроссовер, минивэн және универсал болатынын анықтапты. Бренд бірінші модельді жақында таныстырады.

CX1E атауы бар кроссовер сынақтан өтіп жатыр. Алдын ала мәлімет бойынша ол 007-нің платформасына негізделген және бренд топтамасында компакт Zeekr X-тен бір саты жоғары орналасады. 2025 жылы тұсаукесері өтетін 007 универсалы да сол платформада жасалады. Қытайда мұндай шанаққа сұраныс төмен, бірақ Zeekr бес есікті нұсқаны Еуропа тұрғындарына ұсынады.
EX1E және DX1E индексті екі кроссовердің де дебюті келер жылға жоспарланған. Атауларындағы алғашқы әріптер көлік сегментін көрсетеді деген болжам бар.

2026 жылы шығатын модельдердің атауы белгілі. Олар — Beluga вэні және Grampus кроссовері. Beluga атауы Airbus компаниясының әлемдегі ең үлкен ұшағына сілтеме жасайды, біраз уақыт бұрын Қытайда ұшақ атауын алған минивэн шыққан. Zeekr коммерциялық электрлі фургон жасауды жоспарлап отыр. Дереккөздердің ақпараты бойынша, Grampus кроссовері Zeekr-дің жол талғамайтын моделі болады.

2021 жылы жарық көрген Zeekr 001 лифтбегінің өндірісі 200 мыңға жетті. Компания мерейтойлық экземплярды өз көлігімен 320 мыңнан астам км жүрген клиентке сыйлады. Бұл 001-лер арасында ең көп жүргені болып есептеледі. Лифтбек көп шақырым жүргеніне қарамастан, батареясы тозбаған, климаттық жүйесі толығымен істеп тұр және шанағын тот баспаған.

Қытайда Zeekr саудасы қызып жатыр. Қаңтардан мамырға дейін компания 67.7 мың электромобиль сатты, бұл былтырғы ұқсас кезеңмен салыстырғанда екі есе көп.