Zeekr Қазақстанға жаңарған 7X-ті әкеле ме?

Былтыр қыркүйекте Қазақстандағы автосалондарда ресми сатыла бастаған Zeekr 7X жаңаруы мүмкін. Жергілікті реестрде автомобильдің жаңа құжаттары пайда болды. Өтінім берушілер кроссовердің бірнеше сипаттамасын өзгертті. Ұзындығы бұрынғыдай 4787 мм емес, 4800 мм деп жазылған. Еуропа нарығына арналған 7X-тің өлшемі дәл осындай. Бренд Францияда бірнеше күн бұрын көлікке алдын ала тапсырыс қабылдауды бастады. Бағасы 52 990 еуродан (26.7 млн теңге) басталады, ал клиенттерге 2027 жылдың бірінші тоқсанында жетеді.

Қытайға арналған Zeekr 7X бұдан ұзын (4825 мм). Техникалық жағынан да айырмашылық бар. Жергілікті модель 900 вольттық архитектураға негізделсе, Еуропаға арналған нұсқада 800 вольттық жүйе тұр. Біріншісі қуатты моторлармен және 103 кВт·сағ аккумулятормен жабдықталған. Экспорттық ең қымбат 7X түрленімі 100 кВт·сағ аккумулятор алды.

7X сұсты алдыңғы бампер және жаңа дөңгелек дискілерімен ерекшеленеді. Салоны аса өзгермеген. Дизайнерлер ортаңғы консоль мен есік карталарының құрылымын өзгертті.

Рестайлингтен өткен экспорттық 7X-тің артқы электромоторы 422 емес, 455 ат күшін береді. Екі моторлы модификацияның жалпы қуаты 40 ат күшіне артты. Енді күштік құрылымның жалпы қуаты 680 ат күшіне тең. Батареялар өзгерген жоқ: компания бір моторлы Zeekr 7X-ке 75 кВт·сағ, ал толық жетектіге 100 кВт·сағ аккумулятор орнатады.

Қазақстандағы автосалондарда сатылып жатқан Zeekr 7X-тің суреттерін Kolesa.kz-тегі «Жаңа көліктер» бөлімінен таба аласыз. Сайтта барлық нұсқаның сипаттамасы, комплектациясы және бағасы толық жазылған.

7X Қазақстанға қашан келетіні белгісіз. Марка өкілдері жаңа модельді ресми түрде таныстырған жоқ. Дегенмен 2026 жылдың аяғына дейін электрлі 7 GT универсалын, сондай-ақ 8X және 9X гибридтерін жеткізуді жоспарлап отырғанын хабарлады.