Жаңарған Chevrolet Cobalt Қазақстанда қанша тұрады

Chevrolet-нің Қазақстандағы өкілдері жергілікті нарықтың бестселлері саналатын модельдің жаңарған нұсқасының бағасын жариялады. Атауында MCM қосымшасы бар Cobalt-тың құны 6 390 000 – 6 690 000 теңге аралығында.

Жаңарған Cobalt MCM нарыққа шыққаннан кейін дилерлер бұрынғы модельдің бағасын түсірді. Optimum 6.4vмлн теңгенің орнына 6 млн теңге, ал Elegant 6.8 млн теңгенің орнына 6.3 млн теңге тұрады.

Автомобильдің үш комплектациясы болады. Қарапайым Optimum екі қауіпсіздік жастығы, базалық көмекшілер кешені, кондиционер, алдыңғы орындықтарды жылытқыш, бүйірлік айналар мен артқы әйнекті жылытқыш, Apple CarPlay және Android Auto жүйесімен жұмыс істейтін 7 дюймдік мультимедиа экранын алды. Седан 185/75 R14 өлшемді шиналары бар болат дискілермен жабдықталады. Салоны матамен қапталған.

Elegant 6.5 млн теңге тұрады. Бренд оған мультирөл, круиз-бақылау, интерьердегі күдерімен қапталған ендірмелер, хром есік тұтқасы және 15 дюймдік жеңіл құйма дискілер орнатты.

Үздік Midnight комплектациясы экобылғарымен қапталған салон, хромдалған радиатор торы, күңгірт әйнек пен жиегі қара фара сияқты экстерьерге арналған элементтермен ерекшеленеді.

Cobalt MCM бұрынғы седаннан салонымен ғана емес, күштік құрылымымен де ерекшеленеді. 1.5 литрлік төрт цилиндрлі мотордың B15D2 индексі сақталғанымен, газ үлестіру фазасын өзгерту жүйесі (DVCP) мен басқа электрондық басқару блогы пайда болды. Автоматты беріліс қорабының да басқару блогы жаңарды. Седан басқа ABS блогын алды. Жаңарған қозғалтқыштың қуаты 102 ат күшіне (138 Нм) тең. Рестайлингке дейінгі модификацияның моторы 106 ат күшін (134 Нм) береді.