1 желтоқсанды күтпестен жазғы шинамен жүруге тыйым салына бастады

Қазақстанда жыл сайын 1 желтоқсаннан бастап жазғы шинамен жүруге тыйым салынады. Бұл талап «Дөңгелекті көлік құралының қауіпсіздігі туралы» техникалық регламентте және Жол ережесінде бекітілген. Бірақ ауа райына байланысты шектеу енгізу мерзімі өзгеруі мүмкін.

Мысалы, 20 қазаннан 21 қазанға қараған түнде көктайғақ болуы мүмкін деген болжамға байланысты Павлодар, Ақмола, Қарағанды, Абай және Шығыс Қазақстан облысындағы республикалық жолдарға жазғы шинамен жүрген машиналардың шығуына уақытша тыйым салынды.

«Қазавтожол» ҰК өкілдері Kolesa.kz редакциясына хабарлағандай, жол қауіпсіздігін қамтамасыз ету үшін жазғы шинамен жүруге 1 желтоқсанды күтпей-ақ тыйым салынуы мүмкін. Қажет болған жағдайда кей өңірде шектеу енгізіледі. Автомобиль шинасын полицейлер қауіпті жол бөліктерінің шекарасында орналасқан блокбекеттерде тексереді. Ал қыс мезгілі басталған соң барлық өңірдегі көлік құралдарына қысқы шина орнату қажет.

Айта кетейік, Қазақстанда 1 желтоқсаннан 28 ақпанға дейін машина бүртабан дөңгелек немесе үш шыңы бар тау белгісі, сондай-ақ «М+S», «M&S», «M S» (Mud and Snow — «балшық пен қар») белгісі бар шинамен жүруі керек. Қысқы шинаны бір оське ғана емес, төрт дөңгелектің бәріне орнату қажет. Ереже бойынша бір оське типі, өлшемі және протекторы әртүрлі шина орнатуға рұқсат жоқ. Қысқы шина протекторының қалыңдығы кем дегенде 4 мм болуға тиіс.

Қыста жазғы резинамен жүрген жүргізуші 5 АЕК айыппұл (2026 жылы 21 625 теңге) төлейді.