Zeekr алғашқы гибридін сәуірде көрсетеді

Zeekr гибрид модельдер шығару жоспарын нақтылады. CarNewsChina басылымы топ-менеджерлер мәлімдемесіне сілтеме жасап хабарлағандай, компания алғашқы бензоэлектрлі Zeekr-ді сәуірде Шанхай автосалонында жұрт назарына ұсынады, ол саудаға 2025 жылдың екінші жартысында шығады.

Алғашында Zeekr бренді тек электрокар саласын дамыту үшін құрылған, бірақ Қытай нарығындағы өзгерістерден кейін бренд басшылары бағытын өзгертуге мәжбүр болды. 001 шанағындағы гибридтің сынақ прототипі журналистердің көзіне түскен, бірақ соңғы деректерге сәйкес жаңа күштік құрылым басқа модельге орнатылады.

Компания гибрид ірі кроссовер мен минивэндер үшін әзірленіп жатқанын және олардың өлшемі мен салмағына байланысты жүріс қорын ұлғайту маңызды екенін айтты. Болжамдарға сәйкес, іштен жанатын қозғалтқышы тек генератор қызметін атқаратын тізбекті гибрид болмайды. Жаңа Zeekr көліктерінің бензинді моторы да, электрлі қозғалтқыштары да дөңгелектерді айналдырады.

Geely Automobile Holdings ішкі құрылымын өзгерту туралы шешім қабылдап, өз меншігіндегі екі компанияны біріктіруді көздеп отыр. Жақында Zeekr Lynk&Co-ның акцияларын иемденеді. Кейбір мәлімет бойынша Polestar-ды да осындай жағдай күтіп тұр.

Концерн бірігу жоспарын жариялай отырып, өндірістік ынтымақтастық әсері, жеткізу тізбегін оңтайландыру және т.б. туралы айтты. Іс жүзінде консолидация технологиялық базаны ортақ ету және компонент өндірушілердің бірлескен пулын құру арқылы әзірлеу және өндіру процестерін жеңілдетіп, өнімін арзандатуға ұмтылумен байланысты болса керек. Дегенмен Zeekr және Lynk&Co топтамасын біріктіру әзірге жоспарда жоқ, олар жеке бренд ретінде сатылатын болады.