Zeekr 8X-тің сипаттамасы мен дизайны белгілі болды

Zeekr 8X индексті моделінің промокампаниясын енді ғана бастаған, бірақ Қытай Өнеркәсіп министрлігі жаңа өнім жайлы көп мәліметті мерзімінен бұрын жариялап қойды. Мекеме модельдің сертификат суреттерін ел назарына ұсынды.

Суреттен Zeekr 8X-тің алдыңғы бөлігі 9X моделінікіне ұқсайтыны байқалады, бірақ шанақ сызығы қырлы емес, доғалдау. Кроссовердің ұзындығы — 5100 мм, дөңгелек базасы — 3069 мм. Яғни жаңа өнім 9X-тен 139 мм қысқа. Салмағы нұсқасына байланысты 2660–2820 келі. Кроссовер 2000 кг тіркемені сүйрей алады.

8X-тің гибрид күштік құрылымы 275 ат күшіне ие 2 литрлік турбомоторға негізделген, электромотордың қуаты белгісіз. Автомобильдің сыйымдылығы 55.1 және 70 кВт·сағ болатын екі түрлі батареясы бар. Жүріс қоры тиісінше 256 және 328 шақырымға жетеді. Моторлары жалпы 897 ат күшін береді деген болжам бар.

Zeekr 8X 2026 жылдың бірінші жартысында нарыққа шығады. Машинаның екі қатарлы және үш қатарлы орындығы бар түрленімдері жарық көреді.