Zeekr 001 Қытайдағы ең жылдам электрокар атанды

Geely концернінің құрамына кіретін Zeekr бренді 001 лифтбегінің FR индексті арнайы түрленімін шығарды. Ол 1265 ат күшіне ие жаңа күштік құрылыммен ерекшеленеді. 001 FR Қытайдағы ең жылдам электромобиль атанып отыр.

1 / 5

• 
• 
• 
• 
• 

1 / 5

Zeekr 001 FR әр дөңгелекте бір-бірден орналасқан жалпы төрт мотормен жүреді. Алдыңғы жұп 422, артқы жұп 843 ат күшіне ие, жалпы 1280 Нм береді.

Лифтбек тұрған орнынан қозғалса, жүзге дейін жылдамдықты 2.36 секундта еңсереді, ал жүрген соң есептесе, бұл көрсеткіш 2.07 секунд болады. Мұндай өлшеу әдісін Tesla қолданған, ол бойынша ең қуатты Model S Plaid жаңа өнімнен 0.03 секунд қалып тұр. Бірақ ең жоғары жылдамдық бойынша Tesla (322 км/сағ) алда, FR-дің жылдамдығы — 280 км/сағ. Компания күштік құрылымның ең жоғары жылдамдығы батарея қуаты 50 %-дан жоғары кезде ғана қолжетімді болатынын айтты.

Марка Zeekr 001 FR-ге сыйымдылығы ең жоғары (100 кВт/сағ) батарея орнатты, бірақ жүріс қоры қанша болатынын айтқан жоқ. Жаңа 800 вольтты архитектура аккумуляторды 15 минутта 10-нан 80 %-ға дейін толтыруға мүмкіндік береді.

Борттық күш векторын бақылау жүйесі әр электромоторды басқарады. Соның арқасында Zeekr 001 FR 1.4 G-ге дейінгі бүйірлік қысымға шыдас береді. Сондай-ақ лифтбек орнында тұрып 360 градусқа бұрыла алады.

1 / 11

• 
• 
• 
• 
• 
• 
• 
• 
• 
• 
• 

1 / 11

Батареялы суперкарға 10 поршенді AP Racing суппорты бар 420 миллиметрлік Brembo карбон тежеуіш дискісі орнатылған. Ірі антиқанаты бар бастырықтың арқасында машинаның сырт пішіні агрессивті көрінеді. Ал салонда ештеңе өзгерген жоқ.

Қытайда 001 FR-ге тапсырыс қабылдап жатыр, бірақ бағасы белгісіз. Миллион юань (63 млн теңге) болады деген болжам бар. Компания айына мұндай электрокардың 99 данасын шығарады. Қазанда сата бастайды. Бір айдан кейін Zeekr Қазақстанға келеді, тамызда дистрибьютормен келісімшарт жасаған.