Естеріңізге сала кетейік, Әкімшілік және Қылмыстық кодекске енгізілген мас күйінде көлік жүргізгендердің жауапкершілігін арттыратын өзгерістер 11 қаңтардан бастап күшіне енді. Енді қызып алып көлік тізгіндегендер 7 жылға дейін жүргізуші куәлігінен қағылып, 15 тәулікке қамалуы мүмкін, ал адам өліміне әкеп соққан жол апатын жасаса, көлік басқару құқығынан өмір бойына айырылып, 10 жылға дейін темір торға қамалады.
Бірақ бұл кейбіреулерді еш алаңдатпайтын сияқты. Елордада 11 қаңтардан бері тәртіп сақшылары ішімдік ішіп рөлге отырған 19 жүргізушіні ұстаған, олардың сегізі жол апатын жасапты. Нұр-Сұлтан қалалық полиция департаментінің баспасөз қызметі хабарлағандай, әкімшілік соттың қаулысымен 12 азамат жүргізуші куәлігінен 7 жылға айырылып, 15 күнге түрмеге қамалды. Ал алкогольдік мас күйінде машина жүргізіп, адамның денсаулығы мен көлік құралына зақым келтірген жол апатын жасаған жеті жүргізуші 7 жылға куәлігінен қағылып, 20 тәулікке қамалды.
Салыстыру мақсатында айтар болсақ, өткен жылы астанада орта есеппен күніне үш мас жүргізуші ұсталатын. Яғни, Нұр-Сұлтанда маскүнем жүргізушілердің саны азайған, дегенмен олар әлі де бар.
Атырауда да жағдай оңып тұрған жоқ. Өңірлік полиция департаментінің баспасөз қызметі хабарлағандай, 11 қаңтардан бері бұл аймақта 11 адам қамалып, ұзақ мерзімге жүргізуші куәлігінен қағылған. Айта кетерлігі, заң бұзғандардың қатарында аяғы ауыр әйел де болыпты. Сот шешімімен ол жүктілігіне байланысты түрмеге жіберілмеді, десе де 7 жылға көлік басқару құқығынан айырылды.
Комментариев: 0