«Қазақстан Республикасының кейбір заңнамалық актілеріне қылмыстық және қылмыстық-процестік заңнаманы жетілдіру мәселелері бойынша өзгерістер мен толықтырулар енгізу туралы» ҚР Заңы ресми БАҚ-та 31 желтоқсан күні жарияланды және 2020 жылдың 11 қаңтарынан бастап күшіне енеді. Құжатқа сәйкес, ҚР ҚК-нде енді 345-1-бап (Алкогольдік, есірткілік немесе масаң күйде көлік құралын басқарған адамның жол қозғалысы немесе көлік құралын басқару ережелерін бұзуы) пайда болады.
Аталған баптың талаптарына сәйкес, адам денсаулығына абайсызда ауырлығы орташа зиян келуіне әкеп соққан ЖКО 1 000 АЕК (2 651 000 теңге) көлеміне дейін айыппұл салу не дәл сол мөлшерде түзету жұмыстарын жүргізу, не болмаса 400 сағатқа дейін қоғамдық жұмыстарға тарту не бір жылға дейін бас бостандығын шектеп немесе дәл сол мерзімге бас бостандығынан айыра отырып, көлік жүргізу құқығынан 10 жылға дейін айыру арқылы жазаланады.
Адам денсаулығына аса ауыр зиян келтірген ЖКО үшін жүргізушілерге 3 000 АЕК (7 953 000 теңге) көлеміне дейін айыппұл салу не дәл сол мөлшерде түзету жұмыстарын жүргізу, не болмаса 1 200 сағатқа дейін қоғамдық жұмыстарға тарту не 3 жылға дейін бас бостандығын шектеп немесе дәл сол мерзімге бас бостандығынан айыра отырып, көлік жүргізу құқығынан 10 жылға дейін айыру арқылы жазасы тағайындалады.
Абайсызда адам өліміне әкеп соққан дәл сол әрекет 7 жылға дейін бас бостандығын шектеп немесе дәл сол мерзімге бас бостандығынан айыра отырып, көлік жүргізу құқығынан 10 жылға дейін айыруға әкеп соғуы мүмкін.
Абайсызда екі және одан көп тұлғаның өліміне әкеп соққан мас күйде көлік жүргізу әрекеті үшін айыпты 7 жылдан 10 жылға дейін түрмеге қамалып, көлік басқару құқығынан өмір бойына айырылады.
ҚР ҚК-нің 346-бабына (Көлік құралдарын басқару құқығынан айырылған, алкогольдік, есірткілік немесе уытқұмарлық масаң күйдегі адамның көлік құралын басқаруы, сол сияқты көлік құралын осындай адамның басқаруына беру немесе көлік құралын осындай адамның басқаруына жол беру) да өзгерістер енгізіледі.
11 қаңтардан бастап бұл құқық бұзушылық үшін 200 емес (қазіргідей), 5 000 АЕК (13 255 000 теңге) айыппұл салынады, немесе 5 жылға дейін түрмеге қамалып, көлік басқару құқығынан өмір бойына айырылады.
Көлік құралдарының, жүктердің, жол мен басқа да мүліктің бүлінуіне әкеп соққан дәл сол әрекет және адам денсаулығына жеңіл зиян келтіру 4 жылдан 6 жылға дейін бас бостандығынан айырып, көлік басқару құқығынан өмір бойына айыруға әкеп соғуы мүмкін.
Адам денсаулығына орташа зиян келтірген жағдайда 5 жылдан 7 жылға дейін түрмеге қамап, көлік басқару құқығынан өмір бойына айыру жазасы тағайындалады.
Адам денсаулығына ауыр зақым келсе — 6 жылдан 8 жылға дейінгі мерзімге бас бостандығынан айырылып, көлік басқару құқығынан өмір бойына айырылады.
Абайсызда адам өліміне әкеп соққан жағдайда — 7 жылдан 9 жылға дейінгі мерзімге түрмеге қамалып, көлік басқару құқығынан өмір бойына айырылады.
Абайсызда екі не одан көп адамның өліміне әкеп соққан әрекет үшін 8 жылдан 10 жылға дейінгі мерзімге бас бостандығынан айырылып, көлік басқару құқығынан өмір бойына айырылады.
Комментариев: 0