BYD бірден екі рекорд орнатқанын хабарлады. Жаңарған күштік электроникасы бар U9-дың жаңа модификациясы сериялық жеңіл көліктер арасында әлемдегі ең жылдам машина атанып, жылдамдығы 496.22 км/сағ-қа жетті. Автомобиль Нюрбургрингте Xiaomi SU7 Ultra-ның рекордын бұзды. Жақында Yangwang U9-дың осы нұсқасы сатыла бастайды, бірақ барлығының қолы жете қоймайтын сияқты.
Папенбург автодромында Yangwang U9-дың жылдамдығы Bugatti Chiron Super Sport 300+ (490.48 км/сағ), электрлі Aspark Owl (438.73 км/сағ) және Rimac Nevera R (431.45 км/сағ) көрсеткіштерінен жоғары болды. BYD өнімі Koenigsegg пен Hennessey сияқты гиперкарларды артта қалдырды.
U9-дың Нюрбургрингтегі уақыты — 6 минут 59.157 секунд. Купенің бұл нұсқасы оны аңызға айналған тректегі ең жылдам электромобиль етті. Бұған дейін рекорд Xiaomi SU7 Ultra-ға тиесілі еді, ол 20.8 шақырымды 7 минут 4.957 секундта жүріп өтті.
Суперкар Xtreme деген атау алды. Оның басты ерекшелігі — төрт электромотордан тұратын қуаты артқан күштік құрылым. Қарапайым U9-да ол 1306 ат күшін берсе, Xtreme-дікі 3019 ат күшіне жетеді. Купе BYD-дің ең озық батареяларын алды, Қытайдағы Giti компаниясының электрлі көлік үшін арнайы жасалған шинасымен жабдықталады. Олар 500 км/сағ жылдамдыққа шыдас береді. Мұндай U9-дың аэродинамикалық элементтері жақсарған.
Концерн U9 Xtreme-нің 30 данасын серияға шығарады және оларды тек Қытайда емес, басқа елдерде де саудалайды. Бағасы әзірге жарияланған жоқ, бірақ электрокар Қытайда кем дегенде 1 680 000 юань (128 млн теңге) тұратын қарапайым U9-дан әлдеқайда қымбат болатыны анық.
Комментариев: 0