«Яндекс.Такси» қызметін тоқтата ма?

2021 жылы қаңтарда G-Taxi ЖШС «Яндекс. Такси Б.В.» компаниясына қатысты шағым түсірді. «Яндекс» G-Taxi 2023 жылғы 21 желтоқсанға дейін патенттеген «Автоматтандырылған такси шақырту жүйесі» деген модельді рұқсатсыз пайдаланды деп арызданған компания, оның жұмысына тыйым салуды талап етті.

Шағымданушының талап-арызын ішінара қанағаттандырған сот «Яндекс. Такси Б.В.» компаниясына мынадай міндет артты:

• ҚР аумағында «Яндекс.Такси» автоматты жүйесімен байланысты ақпараттық қызмет көрсетуді тоқтату;
• ҚР аумағындағы пайдаланушылар, тасымалдаушылар мен жүргізушілердің «Сервис «Яндекс.Такси», «Тасымалдаушыларға арналған сервис», «Жүргізушілерге арналған «Яндекс.Про» сервисі қызметтерін пайдалануына мүмкіндік беруді тоқтатып, бұғаттау;
• ҚР аумағындағы тасымалдаушылармен «Яндекс.Такси» автоматты жүйесімен байланысты ақпараттық қызмет көрсету жөнінде келісімшарт жасауды доғару;
• ҚР аумағындағы тасымалдаушылармен жасалған «Яндекс.Такси» автоматты жүйесімен байланысты ақпараттық қызмет көрсету жөніндегі қолданыстағы келісімшарттардың күшін жою;
• ҚР аумағындағы yandex.kz/legal/taxi_offer интернет-ресурсы мен онда жарияланған ақпаратты бұғаттау.

Сот Қазақстанда Google Play және Apple Store интернет дүкендері арқылы «Яндекс Go» және «Яндекс.Про» мобильді қосымшаларын таратуға тыйым салды. Сонымен қатар «Яндекс. Такси Б.В.» мекемесінен 20 419 теңге көлемінде сот шығынын өтеу туралы қаулы шығарды. Сот үкіміне бір ай ішінде, яғни 26 маусымға дейін шағым түсіруге болады.

«Яндекс Go» баспасөз қызметі бұл шешім «Яндекс.Такси» жұмысын бұғаттамайтынын хабарлады. «Біздің сервис жұмыс істеп тұр және қызметін жалғастырады. Патентке қатысты дауға келер болсақ, компания қайта шағым түсіреді», — деп мәлімдеді тасымалдаушылар. Олардың айтуынша, дауға себеп болған пайдалы модельдің патенті «Яндекстің» ғана емес, кез келген такси шақырту қызметінің базалық функциялығын көрсетеді. Бұған ұқсас платформалар 2000 жылдан бері әлемге танылды. G-Taxi тек 2015 жылы өтініш берген және осы әрекеті арқылы «не табыс табуды, не болмаса бүкіл елдегі осындй онлайн-сервистердің жұмысын тоқтатуды көздеп отыр».

G-Taxi өзін «Ресей, Қазақстан, Армения, Украина және Мексикада қызмет ететін халықаралық ІТ-холдинг» ретінде ұсынады. Алайда Finance.kz компанияның такси қызметіне көптен бері еш қатысы жоқ екенін анықтады. Жеті жыл ішінде G-Taxi небәрі 5700 теңге салық төлеген. Қызметкерлер саны бес адамға да жетпейді.