Xpeng флагман болатын жаңа P7+ электромобилін саудаға шығарды. Сауда басталғаннан кейін үш сағатта компанияға 31 528 тапсырыс түсті, бұл бренд тарихындағы рекордтық көрсеткіш. Автомобиль арзан болғандықтан көп адам қызыққан сияқты. Ірі әрі жақсы жабдықталған электрокардың бағасы 186 800 юаньнан (12.8 млн теңге) басталады.
Компания өкілдерінің айтуынша жаңа модель седан, кроссовер және минивэн сияқты бірнеше класстың негізгі артықшылықтарын біріктіреді. Машина заманауи технологияны бағалайтын жас әрі отбасылы клиенттерге арналған. Үш метрлік дөңгелек базасы бар электромобильдің өлшемдері — 5056×1937×1512 мм, жүксалғыш көлемі — 725-2221 литр.
Басында Xpeng P7+ артқы жетекті болады. Ол 245 және 313 ат күшін (әрқайсысы 450 Нм) беретін екі мотормен жабдықталып, алғашқы жүздікті 6.8 немесе 5.9 секундта еңсереді. Максимал жылдамдығы — 200 км/сағ. Инженерлер көлікке 60.7 немесе 76.3 кВт·сағ батарея орнатты. Жүріс қоры 602-710 км-ге жетеді, бірақ бренд бағдарламалық жасақтаманы жаңарту арқылы бұл көрсеткішті 615-725 шақырымға ұлғайтуға уәде берді.
Электрокардың медиажүйесі бірнеше экранмен жабдықталған және Snapdragon SA8295P чипімен жұмыс істейді, ол танымал 8155 чипінен 1.5 есе «ақылды». Жүргізуші ассистенттерінің жүйесін екі Nvidia Orin X чипі басқарады. Оның аппараттық кешенінде 11 камера, 12 ультрадыбыстық сезгек және 3 радар бар, бірақ лидар жоқ. Базалық комплектацияға жақсарған «автопилот» кіреді.
Жабдықтар тізімінде барлық орындықты жылыту, желдету және массаж, артқы орындықтарды электр көмегімен реттеу, үлкен панорамалы шатыр, 20 динамиктен тұратын акустикалық жүйе бар, ал салон әрлеуі наппа былғарысымен қапталған.
Бренд модельді екі стандарт комплектациямен ұсынады. Үздік нұсқасы 198 800 юань (13.7 млн теңге) тұрады, сауда басталғанда Xpeng электромобильдің 218 800 юань (15 миллион теңге) тұратын шектеулі нұсқасын да ұсынған. 500 тиражбен шыққан өнім жылдам сатылып кетті.
Комментариев: 0