Xiaomi YU7-нің арзан нұсқасы болады

Xiaomi-дің автомобиль бөлімшесі былтыр желтоқсанның басында брендтің екінші моделі — YU7 кроссоверін көрсетті. Ол кезде тек толық жетекті түрі шыққан еді, бірақ Қытай өнеркәсіп министрлігі сертификаттау барысында бір моторлы көліктің сипаттамасын жариялады.

Базалық машина 320 ат күшіне ие бір қозғалтқышпен және BYD-дің литий-темір-фосфатты аккумуляторымен жабдықталады. Аккумулятордың сыйымдылығы әлі жарияланбады, бірақ мұндай кроссовердің салмағы 2315 кг (толық жетекті нұсқадан 90 кг жеңіл) болатыны белгілі. Максимал жылдамдығы — 240 км/сағ.

Бір моторлы нұсқаның өлшемдері — 4999×1996×1608 мм, дөңгелек базасы — 3 метр. Биіктігі 8 мм өскенін есептемегенде, толық жетекті электрокардың өлшемдеріне сай келеді. Суреттерден дизайнында еш айырмашылық болмайтынын көруге болады.

Xiaomi машинаны Бейжіңдегі зауытта құрастырады. Кроссовер сұранысқа ие модель ретінде концерннің автомобиль нарығындағы позициясын нығайтуға тиіс, бірақ мұның бәрі кәсіпорынның өнімділігіне байланысты. Биыл Xiaomi өндіріс қуатын жылына 300 мың автокөлікке дейін жеткізу үшін зауыттың екінші алаңын іске қосуды жоспарлап отыр. Өндіріс маусымда басталып, конвейерге бірінші болып YU7 моделі тұруы мүмкін, себебі компания осы модельдің саудасын жаз басында бастайын деп отыр.

2024 жылдың қорытындысы бойынша Xiaomi 135 мыңнан астам электромобильдің кілтін тапсырып, өз жоспарын асыра орындады.